Bakı Ağır Cinayət Məhkəməsi Suriya ərazisində İŞİD terror təşkilatının sıralarında döyüşən Azərbaycan vətəndaşlarını azadlıqdan məhrum edib. Bu barədə “İnterfaks-Azərbaycan” agentliyinə məhkəmədən məlumat verilib.
“Məhkəmənin hökmünə görə, İŞİD terror təşkilatının sıralarında döyüşən Rəşadət Qasımov 11 il, Afiq Qəhrəmanov isə 10 il müddətinə azadlıqdan məhrum ediliblər”, - məhkəmədən qeyd olunub.
A.Qəhrəmanov və R.Qasımov Cinayət Məcəlləsinin 12.1 (Azərbaycan Respublikasının vətəndaşları və Azərbaycan Respublikasında daimi yaşayan vətəndaşlığı olmayan şəxslər Azərbaycan Respublikasının hüdudlarından kənarda törətdikləri əmələ (hərəkət və ya hərəkətsizliyə) görə, bu əməl həm Azərbaycan Respublikasının, həm də ərazisində törədildiyi xarici dövlətin qanunvericiliyinə əsasən cinayət sayılırsa və bu cinayətə görə həmin şəxslər xarici dövlətdə məhkum olunmamışlarsa), 279.1-ci (Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə) və 283-1.3-cü (Azərbaycan Respublikası vətəndaşlarını və ya Azərbaycan Respublikasında daimi yaşayan vətəndaşlığı olmayan şəxsləri dini məzhəbləri yaymaq, dini ayinlərin icrası adı altında, yaxud dini düşmənçilik, dini radikalizm və ya dini fanatizmzəminində Azərbaycan Respublikasının hüdudlarından kənarda aparılan silahlı münaqişələrə cəlb etmə, yaxud bu məqsədlə döyüş təlimləri keçirmə, yaxud həmin məqsədlə fəaliyyət göstərən sabit qrup yaratma və ya belə qrupa rəhbərlik etmə, bu maddədə nəzərdə tutulmuş qruplarda, təlimlərdə və ya silahlı münaqişələrdə iştirak etmə)
maddələri ilə təqsirkar biliniblər.
Cinayət işinin materiallarına görə, R.Qasımov və A.Qəhrəmanov İŞİD sıralarında döyüşlərdə iştirak ediblər. Azərbaycan Dövlət Təhlükəsizlik Xidmətinin həyata keçirdiyi antiterror tədbirləri nəticəsində həbs olunublar. **
R.Babayev