Azərbaycanlı xilasedicilər İraqda baş verən zəlzələnin fəsadlarının aradan qaldırılmasında iştirak etməyə hazırdır. Bu barədə “İnterfaks-Azərbaycan” agentliyinə İraqın Azərbaycandakı müvəqqəti işlər vəkili Fadil Şüveyli deyib.
Onun sözlərinə görə, bu gün Azərbaycan Xarici İşlər Nazirliyinin Dövlət Protokol İdarəsinin rəisi Pərvin Mirzəzadə ilə F.Şüveyli arasında telefon söhbəti olub.
"P.Mirzəzadə İraqda baş vermiş zəlzələnin nəticələrinin aradan qaldırılması üçün Azərbaycanın xilasedicilər göndərməyə hazır olduğunu bildirib. Biz belə operativ reaksiya göstərdiyinə görə Azərbaycana minnətdarıq", - deyə müvəqqəti işlər vəkili vurğulayıb.
Diplomat qeyd edib ki, Azərbaycan hökumətinin İraqa bu diqqəti iki dövlət arasında münasibətlərin dərinliyindən xəbər verir.
F.Şüveyli, həmçinin zəlzələ ilə əlaqədar göstərilən dəstəyə və başsağlığına görə Azərbaycan prezidenti və xalqına minnətdarlığını bildirib.
Qeyd edək ki, İran-İraq sərhədində baş vermiş zəlzələ nəticəsində 328 nəfərədək insan ölüb, xəsarət alanların sayı isə 2,5 min nəfərə yaxındır.*
F.İsazadə