Zaqatala Beynəlxalq hava limanı əsaslı yenidənqurmadan sonra rəsmən istismara verilib. Bu barədə “Azərbaycan Hava Yolları” QSC-dən məlumat verilib.
“Hava limanının ərazisində geniş füzelyajlı hava gəmilərini qəbul etməyə imkan verən uçuş-enmə zolağı (UEZ) tikilmiş, perron xeyli genişləndirilmiş, müasir naviqasiya sistemləri, meteoroloji və işıq siqnalı avadanlıqları quraşdırılmış, həmçinin aerovağzal kompleksinin binası təmir edilib. Vağzalyanı meydanda avtomobil dayanacağı 1200 kv. metr genişləndirilərək 150 minik avtomobilini qəbul olunması üçün şərait yaradılıb”, - məlumatda qeyd olunur.
Tikinti işləri Azərbaycanın “AzVirt” şirkəti tərəfindən həyata keçirilib. Hava limanında uzunluğu 3000 metr, eni 60 metr olan uçuş-enmə zolağı tikilib. Uçuş-enmə zolağı və perronda ümumi qalınlığı 92 sm olan yol geyimi konstruksiyası, o cümlədən 37 sm asfalt-beton layları döşənib.
“Yeni zolaq beynəlxalq tələblərə cavab verir və Zaqatala Beynəlxalq hava limanına geniş füzelyajlı hava gəmilərini qəbul etməyə imkan verəcək”, - məlumatda vurğulanır.
Ümumilikdə tikinti işləri 166 min kv. metr ərazidə aparılıb.
Yeni uçuş-enmə zolağının təchizatı üçün müasir naviqasiya və multilaterasiyasistemlərindən, həmçinin meteoroloji və işıq siqnalı avadanlıqlarından istifadə olunub.
“Hava limanının açılışı günü buraya ilk dəfə olaraq dünyanın ən böyük sərnişin təyyarələrindən biri - “Airbus A340-500” təyyarəsi enib”, - məlumatda qeyd olunur.
Hazırda Azərbaycanın müxtəlif regionlarında 6 beynəlxalq hava limanı fəaliyyət göstərir. **
N.Abbasova