Azərbaycan hökuməti 2018-ci ildə “Şimal-Cənub” nəqliyyat layihəsinin bir hissəsi olan Bakı-Yalama dəmir yolunun yenidən qurulmasına başlayacaq. Bunu prezident İlham Əliyev deyib.
“Azərbaycan ərazisində Şimal-Cənub nəqliyyat dəhlizi ilə bağlı bütün işlər görülüb. Ancaq biz böyük yüklər gözləyirik ki, bu yolla daşınacaq. Ona görə, mövcud olan dəmir yolu daha da yaxşı vəziyyətə gətirilməlidir. Bu məqsədlə biz Bakı-Yalama və Bakı-Astara dəmir yolunun tədricən yenidən qurulması, təmiri ilə bağlı işlər görməliyik”, - İ.Əliyev Nazirlər Kabinetinin2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Onun sözlərinə görə, yerli dəmir yollarının yenidən qurulması qatarların sürətinin artmasına imkan yaradacaq.
İ.Əliyev qeyd edib ki, bu ilin investisiya proqramında Bakı-Yalama dəmir yolunun təmiri, yenidən qurulması məsələsi əksini tapıb. “Bunu biz başlayırıq. Eyni zamanda, Bakı-Astara dəmir yolunun xüsusilə dənizə yaxın olan hissəsinin köçürülməsi məsələsi də öz həllini tapacaq.Bu, önəmli layihədir”, - o bildirib.
Prezident əlavə edib ki, turizmin inkişafı üçün bir layihə də dövlət investisiya proqramına salınıb.“Bu da Ləki-Qəbələ dəmir yolunun tikintisidir. Beləliklə, Qəbələ şəhərinə dəmir yolunun çəkilişi təmin ediləcək. Bu gün Qəbələ Bakıdan sonra Azərbaycanda ikinci turizm mərkəzidir. Əlbəttə ki, dəmir yolunun Qəbələyə çatdırılması turistlərin axınını daha da sürətləndirəcək”, - dövlət başçısı vurğulayıb.
İ.Əliyevin sözlərinə görə, növbəti illərdə Şahdağ xizək kurortuna da dəmir yolunun çəkilişini təmin etmək bizim planlara daxildir. **
A.Əzizov