Azərbaycan 2018-ci ildə yeni kənd təsərrüfatı texnikasının alınmasına 160 mln. manat yönəldəcək. Bunu prezident İlham Əliyev deyib.
“Yeni kənd təsərrüfatı texnikasının alınması üçün 160 mln. manat vəsait nəzərdə tutulub. Burada əsasən taxılbiçən, pambıqyığan kombaynlar, traktorlar, qoşqular, digər avadanlıq nəzərdə tutulur”, - İ.Əliyev Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Onun sözlərinə görə, bu texnika lizinq yolu ilə sahibkarlara veriləcək.
İ.Əliyev vurğulayıb ki, 2017-ci ilin yekunları üzrə Azərbaycanda ASK məhsullarının istehsalının artımı 4,1% təşkil edib. “Bu il meliorativ tədbirlər də daxil olmaqla, kompleks tədbirlər həyata keçirəcəyik ki, 2018-ci ildə ASK sektorunda yaxşı nəticələr olsun”, - o bildirib.
Öz növbəsində iclasda çıxış edən maliyyə naziri Samir Şərifov qeyd edib ki, pambıqçılığa dəstək məqsədilə xüsusi təyinatlı kənd təsərrüfatı texnikalarının alınmasına 2016-2017-ci illərdə dövlət büdcəsindən 295 mln. manat vəsait ayrılıb. “Pambıq istehsalına görə 30 mln manatadək subsidiya verilib”, - nazir vurğulayıb.
S.Şərifov əlavə edib ki, kənd təsərrüfatı dövriyyəsinə əlavə suvarılan torpaq sahələrinin daxil edilməsi, meliorativ sistemin müasir tələblər səviyyəsinə uyğun modernləşdirilməsi və mütərəqqi suvarma üsullarının tətbiqi üçün 2017-ci ilin dövlət və icmal büdcələrindən ayrılan vəsait və xaricdən cəlb edilmiş kreditlər hesabına cəmi 461 mln. manat vəsait yönəldilib. **
A.Əzizov