Yaxın 10 il ərzində Azərbaycanın mülki aviasiyasının 20 ədəd “Boeing 747-8F” təyyarəsinin alınmasına ehtiyac olacaq. Bunu “Azərbaycan Hava Yolları” (AZAL) QSC-nin prezidenti Cahangir Əsgərov deyib.
“Hazırda Azərbaycan mülki aviasiyası özünü Şərq və Qərbi birləşdirən Böyük İpək Yolu layihəsinin rəsmi aviadaşıyıcısı kimi tanıtmışdır. Yükdaşımaları bazarında özünü çox yaxşı tanıdan yeni geniş füzelyajlı uzaq magistrallı “Boeing 747-8F” təyyarələrinin istifadəsi bu strategiyanın həyata keçirilməsinin mühüm bir hissəsidir”, - C.Əsgərov çərşənbə günü “Cargolux” yük aviaşirkətinin prezidenti və icraçı direktoru Riçard Forsonla görüşdə bildirib.
Eyni zamanda C.Əsgərov “Boeing” şirkətinin “Boeing 747-8F” təyyarələrinin istehsalı proqramının bağlanması barədə potensial qərarından təəssüfləndiyini bildirib. “Azərbaycanın mülki aviasiyası üçün yaxın 10 il ərzində 20 ədəd “Boeing 747-8F” təyyarəsinin alınmasına ehtiyac olacaq və bununla da əlaqədar C.Əsgərov bu tipli hava gəmisinin istehsalının davam etdirilməsi üçün “Boeing” Korporasiyasına müraciət etməyi təklif edib”, - məlumatda deyilir.
Öz növbəsində R.Forson Heydər Əliyev Beynəlxalq Aeroportunda göstərilən xidmətlərin yüksək keyfiyyətindən məmnunluğunu bildirib. O, həmçinin “Boeing 747-8F” təyyarələrinin beynəlxalq aviadaşımalar bazarında özünü çox yaxşı tanıtması ilə razı olduğunu və bu təyyarələrə tələbin hələ də qaldığını qeyd edib.
AZAL-ın prezidenti R.Forsona bildirib ki, onun dəvəti ilə yaxın həftələrdə “Boeing Commercial Airplanes”ın prezidenti və baş icraçı direktoru Kevin Makalister Bakıya işgüzar səfərə gələcək.
C.Əsgərov R.Forsona görüşə qoşulmağı və geniş füzelyajlı yük laynerinin gələcəyini müzakirə etməyi təklif edib. **
B.Rüstəmbəyov