Cümə axşamı hakim Yeni Azərbaycan Partiyasının VI qurultayı keçirilir.
“Qurultayda partiyanın prezidentliyə namizədin müəyyənləşdiriləcəy gözlənilir”, - “İnterfaks-Azərbaycan” agentliyinə partiyadan məlumat verilib.
Azərbaycanda prezident seçkiləri oktyabrın 17-də keçirilməli idi. Fevralın 5-də prezident İlham Əliyev 2018-ci il aprelin 11-də növbədənkənar prezident seçkilərinin keçirilməsi haqqında sərəncam imzalayıb.
Azərbaycan prezidentinin İctimai-siyasi məsələlər üzrə köməkçisi Əli Həsənov deyib Azərbaycanda 11 aprel 2018-ci il tarixində növbədənkənar prezident seçkilərinin təyin olunması ölkədə çoxlu sayda beynəlxalq və yerli tədbirlərin keçirilməsi ilə əlaqədardır.Bundan əlavə, o vurğulayıb ki, dünyada mövcud olan təcrübəni nəzərə almaqla, müxtəlif səviyyəli seçkilərin ilin ayrı-ayrı fəsillərində, o cümlədən əvvəlində keçirilməsi daha məqsədəuyğundur. Ə.Həsənovun sözlərinə görə, bu həmçinin sosial və iqtisadi sahədə qarşıda duran vəzifələrin daha effektli icrasına əlavə imkan yaradır.
Eyni zamanda, Azərbaycan prezidentinin xarici siyasət məsələləri üzrə köməkçisi Novruz Məmmədov bildirib ki, Cənubi Qafqaz regionunda və qonşu regionlarda cərəyan edən neqativ proseslərin getdikcə kəskin xarakter alması və Azərbaycanın da yerləşdiyi bölgəyə təsir göstərməsi ehtimalı mövcuddur. Həmin neqativ təsirləri neytrallaşdırmaq məqsədilə atılan qabaqlayıcı addımlardan biri də prezident seçkilərinin vaxtının irəli çəkilməsidir.
Növbədənkənar Azərbaycan Respublikası prezidenti seçkilərinin hazırlanıb keçirilməsi üzrə əsas hərəkət və tədbirlərin təqvim planına əsasən,
nаmizədin qeydə alınması üçün zəruri olan seçki sənədlərinin Mərkəzi Seçki Komissiyasına təqdim edilməsi fevralın 20-dən martın 12-dək aparılacaq.
Seçicilərin tanış olması üçün təqdim edilmiş seçici siyahılarında əlavə dəqiqləşdirmələrin aparılması martın 7-dək həyata keçiriləcək.
Növbədənkənar prezident seçkilərində seçkiqabağı təşviqat martın 19-da başlayacaq, aprelin 10-da isə başa çatacaq. **
F.İsazadə