Türkiyənin “Petkim” neft-kimya kompleksi“STAR” NEZ-in fəaliyyətindən illik $100 mln. məbləğində əlavə gəlir əldə etməyi ümid edir. Bunu Türkiyə mətbuatı “Petkim Petrokimya Holding”in baş icraçı direktoru Anar Məmmədova istinadən məlumat verir.
“Petkim Petrokimya Holding” və “STAR” inteqrasiya olunmuş müəssisə kimi çalışacaq. Bu inteqrasiya hesabına “Petkim”in illik $100 mln. məbləğində əlavə gəlir əldə edəcəyini gözləyirik, bunun $60 mln.-u logistik üstünlük sayəsində əldə olunacaq”, - A.Məmmədov qeyd edib.
O izah edib ki, hazırda “Petkim Petrokimya Holding” nafta idxal edir. Lakin, “STAR” NEZ istismara verilməklə kompleks bu xammalı birbaşa zavoddan boru kəməri vasitəsilə əldə edəcək, bununla da logistikada $60 mln.-a qənaət olunacaq.
“Petkim Petrokimya Holding”in nəzdində iki - etilen istehsalı və ətirli karbohidrogenlərin istehsalıüzrə zavodlar fəaliyyət göstərir ki, nafta onlar üçün əsas xammal rolu oynayır. “STAR” NEZ istismara verilməklə burada istehsal olunan nafta hazırda ətirli karbohidrogenlərin istehsalıüzrə zavodda istifadə olunan ağır naftanı əvəz edəcək”, - A.Məmmədov bildirib.
O, həmçinin məlumat verib ki, kompleks daha $40 mln. əlavə gəliri ümumi infrastrukturun istifadəsi və “STAR”ın xidmətlərindən əldə etməyi ümid edir. “Bizdə yarımadada infrastruktur çox inkişaf edib, biz bunu “STAR” ilə paylaşacağıq”, - A.Məmmədov vurğulayıb.
Onun sözlərinə görə, son 3 il ərzində “Petkim Petrokimya Holding”in fəaliyyəti çox uğurlu olub. 2017-ci ildə kompleks rekord həcmdə gəlir əldə edib, xalis satış həcmi 2016-cı illə müqayisədə 62% - 7,364 mlrd. türk lirəsinə qədər artıb.
“2017-ci ildə “Petkim”in dövriyyəsi təxminən 70%, xalis mənfəət iki dəfədən çox artıb. Maliyyə göstəricilərindən əlavə istehsal göstəricilərində də rekord əldə olunub. “Petkim”in ümumi gücü 3,6 mln. ton təşkil edir, lakin bu göstəriciyə çatmaq çətindir. Biz, gücdən istifadə əmsalını 97%-ə çatdırmaqla bu rəqəmi 3,42 mln. tona çatdırmışıq, baxmayaraq ki, bu əmsal Avropada neft-kimya zavodları üçün orta hesabla 82%-dir”, - A.Məmmədov bildirib. **
N.Abbasova