2017-ci ildə SOCAR (ARDNŞ) İsveçrədəki fəaliyyətindən 78 mlrd. 633 mln. manat gəlir əldə edib ki, bu da 2016-cı ilin göstəricisindən 94,4% çoxdur.
Şirkətin 2017-cı il üzrə konsolidə olunmuş maliyyə hesabatına əsasən, ötən il şirkətin ümumi gəlirlərinin 84,9%-i İsveçrədəki fəaliyyətindən əldə olunan gəlirlərin payına düşür (2016-cı ildə - 77,9%).
Ötən il əldə olunan gəlirlərin 5,382 mlrd. manatı (artım 4,1%) Azərbaycanın, 4,925 mlrd. manatı (41,6%) Türkiyənin, 1,324 mlrd. manatı (artım 14,5%) Birləşmiş Ərəb Əmirliklərinin, 1,185 mlrd. manatı (artım 13,3%) Gürcüstanın, 1,122 mlrd. manatı (artım 78,3%) isə digər ölkələrin payına düşür. SOCAR İsveçrədə SOCAR brendi altnda yanacaqdoldurma məntəqələri şəbəkəsi açmaqla neft məhsullarının pərakəndə ticarəti sahəsində fəaliyyət göstərir.
SOCAR-ın “Esso Ecco Schweiz GmbH” şirkətinin səhmlərini əldə etməsinə dair saziş 2011-ci il noyabrın16-da Sürixdə imzalanıb. “Esso Ecco Schweiz GmbH” şirkətinin səhmləri SOCAR-a $330 mln.-a başa gəlib.
Sazişə əsasən, “Esso Switzerland”ın alınması ilə həmin şirkətə məxsus 160-dan artıq yanacaqdoldurma məntəqəsini özündə birləşdirən pərakəndə satış şəbəkəsi, şirkətin sənaye və topdansatış müştəriləri üçün yanacaq marketinqi ilə məşğul olan qurumu (bu qurum bütün İsveçrə ərazisində kommunal-məişət təyinatlı yanacaq həcmlərinin və balon qazının müstəqil distribüterlərə satışını həyata keçirir), Vangen-Oltendəki Qazdoldurma zavodu, eyni zamanda İsveçrənin Cenevrə və Sürix hava limanlarındakı aviasiya yanacaqdoldurma məntəqələri və müvafiq müştərək müəssisələrin səhmləri, eləcə də terminallara və boru kəmərlərinə malik müştərək müəssisəyə nəzarət edən İsveçrə təchizat və paylama şirkətinin səhmləri SOCAR-ın sərəncamına keçir.
Bundan başqa, “SOCAR Trading” ticarət şirkətinin mənzil-qərargahı Sürixdə yerləşir. **
A.Əzizov