Azərbaycan Xəzərin şərq hissəsində qazın tranzit imkanlarına baxa bilər. Bunu Azərbaycan prezidenti İlham Əliyev deyib.
“Əgər Xəzərin şərq hissəsində öz qazını Azərbaycan üzərindən dünya bazarına çıxarmaq qərarı olarsa, biz əlbəttə ki, buna çox maraqla baxa bilərik və onda öz qərarımızı verə bilərik”, - İ.Əliyev Almaniya kansleri Angela Merkel ilə birgə mətbuat konfransında bildirib.
Buna baxmayaraq, prezidentin sözlərinə görə, Transxəzər kəmərinin tikintisi daha çox qazın sahibi üçün maraqlı olmalıdır.
“Tranzit ölkələr burada təşəbbüs göstərməməlidir.Necə ki, biz qazın sahibi kimi 3500 kilometrlik kəmərin tikintisinə start verdik, böyük maliyyə vəsaiti ayırdıq”, - deyə İ.Əliyev “Cənub Qaz Dəhlizi” layihəsini nəzərdə tutub.
“Dörd hissənin üçü artıq reallaşıb və TANAP-ın açılışı bu ilin iyun ayında baş verib. Qalan hissənin tikintisi prosesi gedir, ümid edirəm ki, burada da heç bir problem olmayacaq və vaxtında – yəni, 2020-ci ildə Azərbaycan qazı 3500 kilometrlik boru xətti ilə Avropa bazarına çıxarılacaq. Beləliklə, Avrasiyanın enerji xəritəsinə çox dəyərli bir töhfə veriləcək. Bununla Azərbaycan qarşısında duran enerji təhlükəsizliyi ilə bağlı olan bütün məsələləri həll etmiş olur”, - İ.Əliyev vurğulayıb.
“Biz danışıqları davam etdiririk, bütün mövqelərlə tanış olmağa hazırıq və prinsipial məsələlər haqqında qərar da bundan sonra veriləcək”, - A.Merkel öz növbəsində Transxəzər qaz kəmərinin tikintisinə dair mövqeyini bildirib. **