Xorvatiya prezidenti Kolinda Qrabar-Kitaroviç Azərbaycanda səfirliyin açılması ilə bağlı qərar qəbul edib.
“Bu yaxınlarda biz qərar qəbul etdik. Azərbaycanda bizim müvəqqəti ofisimiz bağlanır. Lakin mən qərar qəbul etdim ki, Bakıda Xorvatiyanın daimi səfirliyi fəaliyyətə başlasın. Mən bununla bağlı Azərbaycana səfir də təyin edəcəyəm”, - deyə o, prezident İlham Əliyevlə danışıqların yekunları üzrə bildirib.
Xorvatiya prezidenti qeyd edib ki, azərbaycanlı həmkarı ilə görüşdə əməkdaşlığın bir sıra sahələrində mövcud olan böyük potensial müzakirə olunub. “Mən bu gün imzalanmış sənədləri vacib hesab edirəm, alqışlayıram və bu, bizim ikitərəfli münasibətlərimizə təkan verəcək. İnanıram ki, biz müdafiə sahəsində də əməkdaşlığımızı inkişaf etdirəcəyik. Çünki biz, 2013-cü ildə müdafiə sahəsində də əməkdaşlıqla bağlı anlaşma memorandumu imzaladıq”, - deyə o qeyd edib.
Kolinda Qrabar-Kitaroviçin sözlərinə görə, bu baxımdan azərbaycanlı və xorvatiyalı zabitlər və hərbçilər, əsgərlər bir sıra müxtəlif hərbi kurslarda, hərbi məktəblərdə öz təhsilini artıra bilərlər.
O, Aİ ilə münasibətlərin ikitərəfli formatda inkişafı ilə bağlı Azərbaycanın mövqeyini yüksək qiymətləndirib. “Xorvatiya güclü iradəyə əsaslanaraq Cənub və Mərkəzi Avropa ölkələri ilə Xəzər hövzəsi arasında daha geniş əməkdaşlığın inkişaf etdirilməsinə tərəfdardır. Azərbaycan əslində, bu təşəbbüsü dəstəkləyibdir. Bu təşəbbüsə digər tərəfdaşlar da, maraqlı dövlətlər də qoşula bilər. Bu təşəbbüsdə dünyanın müxtəlif şirkətləri iştirak edə bilər. Buxarestdə 2018-ci ilin sentyabrında bununla bağlı keçiriləcək Zirvə görüşündə hesab edirik ki, mühüm addımlar atılacaq”, - deyə o vurğulayıb.
Öz növbəsində, prezident İlham Əliyev Azərbaycanın Aİ ilə əməkdaşlığının uğurla inkişaf etdiyini diqqətə çatdırıb. O xatırladıb ki, bu ilin iyul ayında Brüsseldə Avropa İttifaqı ilə Azərbaycan arasında “Tərəfdaşlıq prioritetləri” sənədi imzalanıb. “Bu, yeni Sazişin imzalanması üçün çox önəmli bir addımdır. Hazırda Avropa İttifaqı və Azərbaycan yeni Saziş üzərində işləyir. İşlər yaxşı gedir və Xorvatiya həmişə bizim Avropa İttifaqı ilə əməkdaşlığımızı dəstəkləyib və öz dəyərli töhfəsini verib”, - deyə İ.Əliyev bildirib.*
F.İsazadə