2022-ci ilə qədər Azərbaycan un satışı üzrə MDB-də ikinci yerə çıxaracaq, bazar payı 9,8% təşkil edəcək. “BusinesStat” şirkətinin analitikləri belə hesab edirlər.
“BusinesStat”ın tərtib etdiyi “MDB dövlətlərində un bazarının təhlili”nə əsasən, 2013-cü ildən 2017-ci ilədək regionda un satışı 14,2% azalıb: 22,1 mln. tondan 18,9 mln. tonadək. Bütün dövr ərzində göstəricinin illik 2,7-6% azalması müşahidə olunub.
MDB ölkələri arasında un satışının ən iri həcmi Rusiyanın payına düşüb. 2013-2017-ci illərdə ümumi göstəricidə bu ölkənin payı 2013-cü ildə 44,4%-dən 2016-cı ildə 50%-dək dəyişib. Bu göstərici üzrə ikinci yerdə Özbəkistan, üçüncü- Ukrayna, dördüncü isə Qazaxıstandır.
“BusinesStat”ın proqnozlarına əsasən, 2018-ci ildə MDB ölkələrində un satışı həcmi bir qədər artacaq (ötən ilin səviyyəsinə nisbətən 0,4%).
“2019-2022-ci illərdə göstərici illik orta temp ilə 0,2% azalacaq və proqnoz dövrünün sonuna 18,9 mln. ton təşkil edəcək. Rusiya MDB ölkələri arasında un satışı üzrə 49,8-50% çərçivəsində göstərici ilə lider olaraq qalacaq (2022-ci ildə 49,9%). 2022-ci ildə regionda un satışı üzrə ikinci yeri bazarın ümumi həcmindən 9,8% pay ilə Özbəkistanı geridə qoyaraq Azərbaycan tutacaq. 2022-ci ildə 3-cü yerdə 9,2% pay ilə Özbəkistan qərarlaşacaq. Qazaxısayn isə 4-cü yerini qoruyub saxlayacaq (8,5%)”, - “BusinesStat”ın məlumatında qeyd olunur. **
A.Əzizov