Azərbaycanın birinci vitse-prezidenti Mehriban Əliyeva İtaliyanın ATƏT-in fəaliyyətdə olan sədri kimi Dağlıq Qarabağ münaqişənin həllində böyük rol oynayacağına ümid edir.
“Biz hesab edirik ki, Ermənistan-Azərbaycan Dağlıq Qarabağ münaqişəsi beynəlxalq hüququn normaları əsasında öz həllini tapmalıdır, Azərbaycanın ərazi bütövlüyü bərpa olunmalıdır, Dağlıq Qarabağ və ətrafında yerləşən 7 rayon işğaldan azad olunmalıdır, bütün qaçqınlar və məcburi köçkünlər öz doğma yurdlarına qayıtmalıdır. Ümidvaram ki, İtaliya ATƏT-in fəaliyyətdə olan sədri kimi münaqişənin həllində böyük rol oynayacaq”, - M.Əliyeva çərşənbə axşamı Romada bildirib.
M.Əliyeva “Azərbaycan Xalq Cümhuriyyətinin yaranmasının 100 illiyi və Azərbaycan Respublikası ilə İtaliya Respublikası arasında strateji tərəfdaşlıq münasibətləri” adlı konfransda iştirak edir.
Onun sözlərinə görə, Azərbaycan sülhsevər ölkədir. “Biz qonşularımızla və digər dövlətlərlə siyasətimizi qarşılıqlı maraq və qarşılıqlı hörmət əsasında qururuq. Lakin təəssüf hissi ilə qeyd etməliyəm ki, artıq 25 ildən çoxdur Azərbaycan xalqı qonşu Ermənistanın işğalçı siyasətindən əziyyət çəkir. Bu siyasət nəticəsində ölkəmizin beynəlxalq səviyyədə tanınmış ərazisinin 20%-i işğal altındadır, 1 mln. soydaşımız məcburi köçkün və qaçqın vəziyyətində yaşayır”, - M.Əliyeva qeyd edib.
O vurğulayıb ki, Ermənistan BMT Təhlükəsizlik Şurası tərəfindən qəbul edilmiş 4 qətnaməni icra etmir. “Bununla da Ermənistan beynəlxalq hüququn normalarını kobudcasına pozaraq işğalçı siyasətini davam etdirir.Bir daha qeyd etmək istəyirəm ki, Azərbaycan sülhsevər ölkədir, biz danışıqlar aparırıq”, - M.Əliyeva vurğulayıb. **
A.Əzizov