20 emalatxana binasının tikintisi üçün “Azərxalça” ASC-yə dövlət büdcəsindən 37,7 mln. manat vəsait ayrılıb. Bu barədə cəmiyyətin sədri Vidadi Muradov məlumat verib.
“20 emalatxana binasının tikintisi, infrastrukturunun yaradılması, avadanlıq və dəzgahlarla təchizatı üçün “Azərxalça” ASC-yə dövlət büdcəsində investisiya xərcləri üçün nəzərdə tutulan vəsaitdən 37 mln. 475 min manat vəsait ayrılıb”, – deyə o, oktyabrın 9-da prezident İlham Əliyevin sədrliyi ilə Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı bildirib.
Bundan başqa, dövlət büdcəsində dövlət əsaslı vəsait qoyuluşu üçün nəzərdə tutulmuş vəsaitdən Yunəyirici-Boyaq Fabrikinin tikintisi və avadanlıqlarla təchizatı üçün 27 mln. 420 min manat, regional yun və boyaq bitkilərinin tədarükü məntəqələrinin yaradılması məqsədilə 6 mln. 500 min manat ayrılıb.
Sədrin sözlərinə görə, 2019-cu ildə Azərbaycanın müxtəlif regionlarında “Azərxalça”nın daha 10 filialı yaradılacaq.
V.Muradov əlavə edib ki, Şəki şəhərində, Masallı və Hacıqabul rayonlarındakı sənaye məhəllələrində üç regional tədarük məntəqəsi yaradılacaq. Müasir texniki avadanlıqlarla təmin ediləcək bu məntəqələrdə il ərzində 1500 ton yun və boyaq bitkiləri xammalı toplanılacaq”, - deyə o vurğulayıb.
V.Muradovun sözlərinə görə, ASC-nin istehsalı olan xalçaların satışa çıxarılması prosesinin intensivləşdirilməsi məqsədilə 2019-cu ildə Sumqayıt Kimya Sənaye Parkında Hazır Xalçaların Emal Mərkəzi də inşa ediləcək.*
R.Babayev