Azərbaycan Banklar Assosiasiyası (ABA) ölkədə rəqəmsal ödənişlərin genişləndirilməsi ilə əlaqədar məsələlərin müzakirəsi üçün İşçi Qrup yaradıb. Bu barədə assosiasiyanın məlumatında deyilir.
Qurumun Rəyasət Heyətinin iclasında rəqəmsal ödənişlərin genişləndirilməsi istiqamətində tədbirlər, bu sahədə cari vəziyyət, ABA üzvlərinin təklif və rəyləri müzakirə edilib.
“İclasda "2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı" ilə əlaqədar məsələlərin müzakirəsi üçün 7 bankın iştirakı ilə İşçi Qrup yaradılıb. İşçi Qrupa "Kapital Bank" ASC, "Rabitəbank" ASC, "Azərbaycan Beynəlxalq Bankı" ASC, "Unibank" KB ASC, "Bank Respublika" ASC, "Yapı Kredi Bank" QSC və "Paşa Bank" ASC daxildir”, - deyə məlumatda bildirilir.
Rəyasət Heyətinin iclası zamanı noyabrın 15-16-da keçiriləcək III Beynəlxalq Bankçılıq Forumu və illik əsasda keçirilən "Bankçılıq Mükafatları 2018" tədbiri müzakirə olunub.
АВА 1990-cı ildən fəaliyyət göstərir. Hazırda 29 bank, 3 bank olmayan kredit təşkilatı və 1 prosessinq mərkəzi assosiasiyanın üzvüdür.*
N.Abbasova