Səbail Rayon Məhkəməsi bu gün Azərbaycan Xalq Cəbhəsi partiyasının (AXCP) sədri Əli Kərimlinin 2,5 min manat məbləğində cərimələnməsi barədə qərar qəbul edib. Bu barədə yerli mətbuat xəbər verir.
İclasdan sonra AXCP sədri sərbəst buraxılıb.
Saxlanılan digər şəxslər 400-500 manat məbləğində cərimə ediliblər.
Daha əvvəl Bakı Şəhər Baş Polis İdarəsinə istinadən verilən məlumata görə, noyabrın 17-si saat 16.00 radələrində Azərbaycan Xalq Cəbhəsi Partiyasının təxmini sayı 150 nəfərə qədər olan üzvləri Bakı Şəhər Baş Polis İdarəsi tərəfindən əvvəlcədən xəbərdarlıq edilmələrinə baxmayaraq, özlərinin adlandırdıqları “Meydan hərəkatı”nın 30 illiyi ilə əlaqədar, əslində isə siyasi məqsədlərlə paytaxtın Parlament prospektinə toplaşmaqla Şəhidlər Xiyabanı istiqamətində yürüş-mitinq keçirməyə cəhd göstəriblər. İctimai asayişin pozulması ilə müşayiət olunan icazəsiz yürüş-mitinqin qarşısı alınıb. Aksiyanın 52 nəfər iştirakçısı Səbail Rayon Polis İdarəsinə gətirilib. Onlardan 41 nəfəri xəbərdarlıq edilərək sərbəst buraxılıb.
11 nəfər, o cümlədən AXCP-nin sədri Əli Kərimli isə saxlanılıb.
Faktla bağlı Səbail Rayon Polis İdarəsində İnzibati Xətalar Məcəlləsinin 513.1 və 513.2-ci maddələri ilə inzibati protokollar tərtib olunub və toplanmış materiallar baxılması üçün rayon məhkəməsinə göndərilib.*
R.Babayev