Azərbaycan gömrükçüləri külli miqdarda dərman preparatlarının Türkiyədən qanunsuz yolla ölkə ərazisinə gətirilməsinin edilməsinin qarşısını alıblar. Bu barədə Dövlət Gömrük Komitəsinin Mətbuat və İctimaiyyətlə Əlaqələr İdarəsindən məlumat verilir.
"Daxil olan məlumat əsasında Türkiyədən "Mersedes Benz 2528" markalı, 01 CB 168/01 ZA 568 dövlət nömrə nişanlı nəqliyyat vasitəsində sənədlərdə qeyd olunmamaqla ölkə ərazisinə dərman preparatlarının gətiriləcəyi, Qazax rayonu ərazisində digər nəqliyyat vasitələrinə boşaldılaraq realizə ediləcəyi müəyyən edilib”, - məlumatda deyilir.
Əməliyyat qrupu tərəfindən həmin nəqliyyat vasitəsi nəzarətə götürülüb və "Qırmızı Körpü" gömrük postundan ölkə ərazisinə daxil olduqdan sonra Qazax rayonunun Çaylı kəndi ərazisində yerləşən dayanacaqda bir qrup şəxs tərəfindən gözlənildiyi müəyyən edilib.
“Dərman preparatlarının "DAF TE47MS" markalı nəqliyyat vasitəsinə boşaldılması zamanı əməliyyat qrupu prosesə müdaxilə edib və ərazidəki şübhəli bilinən və yuxarıda qeyd edilən nəqliyyat vasitələri saxlanılaraq Tovuz Gömrük Postunun inzibati binasının həyətinə gətirilib”, - DGK məlumat verir.
Gömrük baxışı zamanı "Mersedes Benz 2528" markalı nəqliyyat vasitəsinin yük yerindəki qutular boşaldılıb və həmin qutularda mal müşayiət sənədlərində göstərilməyən 419 adda, ümumi sayı 883 min 988 qutu dərman preparatları və mal müşayiət sənədlərində göstərilən 5 adda, ümumilikdə 537 qutu tibbi ləvazimat aşkar edilib.
Digər avtomobillərə keçirilən gömrük baxışı zamanı 20 800 ədəd tibbi ləvazimat aşkar edilib.
Faktla bağlı araşdırma aparılır. **
R.Babayev