“Azərenerji” ASC2018-ci ilin sentyabr-noyabr aylarında elektrik enerjisi sistemi üzrə 210 MVt itirilmiş generasiya gücünü bərpa edib. Bu barədə cəmiyyətin məlumatında deyilir.
“Cari ilin iyul ayının 3-də baş vermiş məlum hadisənin təkrarlanmaması üçün “Azərenerji” ASC tərəfindən “Reabilitasiya proqramı” hazırlanıb. Proqram çərçivəsində işlərə sentyabr ayından başlanılıb və indiyədək elektrik enerjisi sistemi üzrə 210 MVt itirilmiş generasiya gücü bərpa edilib”, - deyə məlumatda bildirilir.
“Cənub” ES-də 180 MVt itirilmiş güc bərpa edilib ki, bu da orta hesabla 5 rayonun elektrik enerji tələbatı miqyasındadır. Görülən işlər nəticəsində stansiyanın yükü 520 MVt-dan 700 MVt-a qaldırılıb.
“Cənub ES”-də aparılan planlı təmir işləri davam etməkdədir və yaxın zamanlarda yük məhdudiyyətinin tam aradan qaldırılması mümkün olacaq.
Bundan başqa, “Şimal ES”-də analoji olaraq təmir və bərpa işləri nəticəsində stansiyanın gücü 350 MVt-dan 370 MVt-a yüksəldilib, 20 MV tgüc məhdudiyyəti aradan qaldırılıb. “Bakı ES”-in yükü isə 80 MVt-dan 90 MVt-a çatdırılıb.
Xəbər verildiyi kimi, 2018-ci il iyulun 3-nə keçən gecə “Azərbaycan” İES-də baş vermiş qəza nəticəsində ölkənin 39 şəhər və rayonunun enerji təchizatı kəsilib.
“Azərenerji” ASC-nin qəzaya lazımi səviyyədə hazır olmaması, fəaliyyətində mövcud olan texniki və bir sıra digər çatışmazlıqlar üzündən qəzaya adekvat reaksiya verə bilməməsi iyulun 3-də ölkənin enerji sistemində qəzanın əsas səbəblərindən biri olub.
Bu rəy prezident İlham Əliyevin tapşırığı ilə yaradılmış və baş nazirin birinci müavini Yaqub Eyyubovun başçılıq etdiyi xüsusi Dövlət Komissiyası tərəfindən hazırlanıb.
Energetika naziri Pərviz Şahbazov rəsmi “Azərbaycan” qəzetində dərc olunmuş məqaləsində bildirib ki, elektroenergetika sisteminin təhlükəsiz, dayanıqlı, etibarlı və səmərəli fəaliyyətinin təmin edilməsi üçün Energetika Nazirliyi və “Azərenerji” ASC ilə Almaniyanın VPC şirkəti arasında “Azərbaycan” İES-in texniki auditi, onun reabilitasiyasına dair Baş Planın, eləcə də “Azərenerji” ASC-nin ötürmə sisteminin optimallaşdırılmasına dair proqramın hazırlanması üzrə müqavilə imzalanaraq onların icrasına başlanıb.
Bundan başqa, Energetika Nazirliyi “Azərenerji” ASC ilə birlikdə xarici ekspertləri cəlb etməklə “2018-ci ildə baş vermiş qəza hallarının təhlili və Azərbaycan Respublikasının enerji sisteminin elektrik şəbəkəsinin gücləndirilməsinə dair tövsiyələrin hazırlanması” layihəsi üzrə işləri davam etdirir.
Nazir vurğulayıb ki, “Azərenerji” ASC-nin generasiya güclərinin optimallaşdırılması və bərpası Proqramı” hazırlanıb. Bütün modul tipli elektrik stansiyalarını, eləcə də “Cənub”, “Şimal” və “Sumqayıt” istilik elektrik stansiyalarını əhatə edən proqram üç il müddətində həyata keçirilməlidir.*
B.Rüstəmbəyov