Azərbaycan gündəlik neft hasilatını 2018-ci ilin oktyabr ayının göstəricisi ilə müqayisədə 20 min barrel - 763 min barrelədək azaldacaq. Bu barədə Energetika Nazirliyinin məlumatında deyilir.
«Dünya neft bazarının nizamlanması prosesinə dəstək məqsədilə Azərbaycan da hasilatın azaldılması sazişinə qoşulub. Oktyabr ayında gündəlik neft hasilatı 783 min barrel olan Azərbaycan müvafiq hasilatın təxminən 20 min barrel azaldılması ilə bağlı öhdəlik götürüb. Beləliklə, Azərbaycan növbəti ildən gündəlik hasilatı 763 min barrel həcmində saxlayacaq», - deyə məlumatda bildirilir.
Energetika naziri Pərviz Şahbazov hesab edir ki, OPEC+ iclasının yekunları üzrə neft hasilatının azaldılmasına dair qəbul olunmuş qərar neft bazarı və neft sənayesinin inkişafı üçün çox mühüm bir addımdır. “Son vaxtlar siyasi və iqtisadi amillərin təsiri ilə neftin qiyməti ucuzlaşırdı və proses davamlı xarakter alırdı. Bazarda istehsalın istehlakı üstələməsi və dünya iqtisadiyyatında zəifləmə prosesinin gələn il üçün də proqnozlaşdırılması neftin ucuzlaşmasını təmin edirdi. Neft bazarına yeganə dəstəyi ancaq OPEC+ ölkələri verə bilərdi. Bugünkü qərar neft istehsalçıları, ümumən neft bazarı və neft sənayesinin inkişafı üçün çox mühüm bir addım oldu”, - deyə o qeyd edib.
Xəbər verildiyi kimi, dekabr ayının 7-də Vyanada Neft İxrac Edən Ölkələr Təşkilatına üzv və qeyri-üzv dövlətlərin nazirlərinin V görüşündə neft hasilatının 2018-ci ilin oktyabr ayı səviyyəsindən gündəlik 1,2 mln. barrel azaldılması ilə bağlı razılıq əldə olunub. Yeni qərara əsasən, 2019-cu ilin yanvar ayından etibarən OPEC üzvləri neft hasilatını sutkada 800 min barrel, kartelə daxil olmayan ölkələr isə 400 min barrel azaldacaqlar.*
A.Əzizov