Prezident İlham Əliyev Azərbaycan və Rusiya xalqıarı arasında etimadın yüksək səviyyədə olduğunu qeyd edir.
İ.Əliyev çərşənbə axşamı Bakıda Moskvanın və bütün Rusiyanın Patriarxı Kirilli qəbul edib. Bu barədə dövlət başçısının saytında məlumat verilir.
“Bizdə qarşılıqlı etimad səviyyəsi prezidentlərdən başlamış adi vətəndaşlara qədər bütün səviyyələrdə çox yüksəkdir. Demək istərdim ki, keçən il rekord sayda – 900 minə yaxın rusiyalı Azərbaycana səfər edib. Bu, onu göstərir ki, insanlar və ölkələr arasında münasibətlər ən yüksək səviyyədədir”, - İ.Əliyev Patriarx ilə görüş zamanı bildirib.
“Onlar (rusiyalılar - İF) özlərini evdəki kimi hiss edir, buraya yaxşı niyyətlərlə gəlir və burada onlara doğma münasibət bəsləyirlər”, - prezident əlavə edib.
İ.Əliyev xatırladıb ki, 2018-ci ildə il Rusiya və Azərbaycan prezidentləri arasında altı görüş olub, bu Bakı ilə Moskva arasında münasibətlərin mahiyyətini və xarakterini, yaxınlığını əks etdirən rekord göstəricidir.
“Bizim münasibətlərimiz qonşular arasında münasibətlərə nümunə ola bilər. Bizi tarixi baxımdan bağlayan səbəblər çoxdur və bu gün - biz bütün istiqamətlərdə fəal qarşılıqlı əlaqə saxladığımız bir vaxtda bu əməkdaşlıq, əlbəttə, bizim regionda, Qafqazda sülhün möhkəmlənməsi işində xüsusi əhəmiyyət kəsb edir. Buna görə də biz dövlətlərarası münasibətlərin bütün palitrasına nəzər salanda, əlbəttə, müsbət dinamika görürük”, - prezident deyib.
Dövlət başçısı həmçinin müxtəlif konfessiyaların nümayəndələri arasında dinlərarası dialoqun möhkəmlənməsində Patriarxı Kirillin rolunu yüksək qiymətləndirib.
“Dünyada təhlükəsizliyin, əməkdaşlığın və qarşılıqlı anlaşmanın möhkəmləndirilməsi işində Sizin rolunuz bütün dünyada, o cümlədən bizim ölkəmizdə çox yüksək qiymətləndirilir. Siz dinlərarası dialoqun, müxtəlif konfessiyaların, müxtəlif millətlərin, ölkələrin nümayəndələri arasında qarşılıqlı anlaşmanın möhkəmlənməsi işində çox mühüm rol oynayırsınız”, - prezident qeyd edib.
İ.Əliyev Patriarxı Kirillin Azərbaycana səfərinin münasibətlərin - həm dinlərarası əməkdaşlıq sahəsində, həm də bütövlükdə çox uğurla və dinamik inkişaf edən Rusiya-Azərbaycan əlaqələrinin möhkəmlənməsi işinə xidmət edəcəyinə əminlik ifadə edib. **
F.İsazadə