2018-ci il iyulun ayında Gəncədə baş vermiş iğtişaşla bağlı altı cinayət işi baxılması üçün Gəncə Ağır Cinayətlər Məhkəməsinə göndərilib. Bu barədə Baş Prokurorluğun mətbuat xidməti məlumat verib.
“Gəncə hadisələri ilə bağlı cinayət işinin materiallarından 51 şəxs barəsində 6 cinayət işi ayrıca icraata ayrılaraq aidiyyəti üzrə baxılmaları üçün Gəncə Ağır Cinayətlər Məhkəməsinə göndərilib”, - baş prokuror Zakir Qaralovun rəhbərliyi ilə 2018-ci ildə görülmüş işlərin vəziyyəti və qarşıda duran vəzifələrin müzakirəsinə həsr olunmuş geniş kollegiya iclasında bildirilib.
Həmçinin qeyd olunub ki, Gəncədə baş vermiş iğtişaşla bağlı 59 nəfər təqsirləndirilən şəxs qismində cəlb olunmaqla barələrində həbs qətimkan tədbiri seçilib, 1 nəfər barəsində isə həbsli axtarış elan olunub.
Bundan əlavə, Gəncədə icra başçısı Elmar Vəliyevə qarşı sui-qəsd ilə əlaqədar terror aktının törədilməsi, Konstitusiya quruluşunun dəyişdirilməısi və digər ağır cinayətlərin törədilməsi cəhdində ittiham olunan mütəşəkkil qrupun 29 üzvü saxlanılıb. “Daha 11 nəfər beynəlxalq axtarışa elan edilib”, - Baş Prokurorluq qeyd edir.
Xəbər verildiyi kimi, 2018-ci il iyulun 3-də axşam saatlarında Gəncədə icra başçısı Elmar Vəliyevə qarşı sui-qəsd törədilib. Nəticədə E.Vəliyev yaralanıb. Sui-qəsdi törədən Yunis Səfərov hüquq-mühafizə orqanları tərəfindən hadisə yerində saxlanılıb. İstintaq Y.Səfərovun hərəkətlərini məqsədyönlü və planlaşdırılmış terror aktı kimi qiymətləndirib.
İyulun 10-da axşam saatlarında Gəncə şəhərində razılaşdırılmayan aksiyanın qarşısının alınması zamanı iki polis zabiti - Gəncə Şəhər Baş Polis İdarəsinin rəis müavini İlqar Balakişiyev və Nizami Rayon Polis İdarəsinin rəis müavini Səməd Abbasov həlak olublar.
Aksiya Y.Səfərova dəstək məqsədi daşıyıb. Aksiyanı 150-200 nəfərdən ibarət radikal dini yönümlü bir qrup keçirməyə cəhd göstərib. Xidməti vəzifələrini yerinə yetirən polis əməkdaşlarının xəbərdarlığına məhəl qoymayan qanunazidd hərəkətlərin iştirakçıları özləri ilə gətirdikləri küt və kəsici-deşici alətlərlə asayiş keşikçilərinə müqavimət göstəriblər. **
R.Babayev