“Azərenerji” ASC 2019-cu ilin mart aylnda Azərbaycanın enerji sistemində SCADA sisteminin yenilənməsi üzrə işlərin həyata keçirilməsi məqsədilə şirkət seçiminə dair tender keçirməyi planlaşdırır. Bu barədə “İnterfaks-Azərbaycan” agentliyinə cəmiyyətdən məlumat verilib.
“Hazırda xarici məsləhətçi şirkətin nümayəndəsinin iştirakı ilə texniki spesfikasiya hazırlanır. Mart ayında xarici şirkətlərin də iştirakı ilə tender keçiriləcək. Bu, Azərbaycanın enerji sistemində SCADA sisteminin tətbiqi üzrə işlərin ikinci mərhələsi olacaqş Azərbaycan enerji sistemində SCADA layihəsinin birinci mərhələsi 2005-2011-ci illərdə həyata keçirilib”, - ASC-dən qeyd ediblər.
Rəqəmsal texnologiyaların sürətlə inkişafı nəzərə alınmaqla hazırda bəzi komponentlər SCADA sisteminin istehsalçı şirkətlər tərəfindən dəstəklənmir və istifadədən çıxarlııb. Bu, mövcud sistemdə müəyyən problemlər yaradır.
“Yenilənəcək SCADA sistemi daha çox enerji obyektini əhatə etməklə müasir idarəetməni nəzərdə tutur və tam avtomatlaşdırılacaq. Hazırda istismarda olan SCADA idarəetmə sistemi 45 enerji obyektini əhatə edir. SCADA layihəsinin həyata keçiriləcək ikinci mərhələsi çərçivəsində 30 elektrik stansiyasının və 150-yə yaxın yarımstansiyanın əhatə olunması nəzərdə tutulur”, - cəmiyyətdən məlumat verilib.
ASC-dən bildiriblər ki, yeni sistemin imkanları geniş olacaq və müstəqil enerji istehsalçılarının qoşulmasına da imkan yaranacaq. Eyni zamanda yeni sistemin tərkibində elektrik enerjisi bazarını (spot-bazar və balanslaşdırıcı bazar) texnoloji cəhətdən dəstəkləyən alt-sistem nəzərdə tutulacaq.
Cəmiyyətdən dəqiqləşdiriblər ki, SCADA sisteminin yenilənməsini zəruri edən amillərdən biri ötən il istehsalçı şirkətlərdən birinin auditi zamanı aşkar olunan texniki çatışmazlıqlar olub.
“Azərenerji” etibarlılıq və təhlükəsizliyi gücləndirmək üçün enerjisistemin Dispetçer İdarəetmə Mərkəzini yenidən qurur. Bununla ölkənin enerji sistemi həm idarəetmə, həm də kiber hücumlara qarşı daha dayanıqlı olacaq. Yüksək gərginlikli elektrik ötürmə xətləri və yarımstansiyalarda qəzaların qarşısını almaq məqsədilə gərginliyin kəskin düşməsinin qarşısını alan mikroprossesor texnikası əsasında əks-qəza avtomatikası işə salınıb”, - cəmiyyətdən vurğulanıb.
N.Abbasova