Prezident İlham Əliyev bu gün Nəqliyyat, Rabitə və Yüksək Texnologiyalar Nazirliyinin tabeliyində İnnovasiyalar Agentliyinin nizamnaməsini və strukturunu təsdiq edib. Bu barədə dövlət başçısının saytında məlumat verilir.
Nizamnaməyə əsasən agentliyin vəzifələrinə innovasiya fəaliyyəti, yerli sahibkarlıq subyektlərinə müasir texnologiyaların və texnoloji həllərin əldə olunmasına yardım göstərilməsi və onların transferinin təşkili, innovasiyayönümlü elmi tədqiqatların dəstəklənməsi, innovativ layihələrin (o cümlədən startapların) təşviq edilməsi, onların qrant, güzəştli kredit və nizamnamə kapitalına sərmayə (o cümlədən vençur maliyyələşməsi) ilə maliyyələşdirilməsi daxildir.
İnnovasiyalar Agentliyinin ilkin nizamnamə fondunun məbləği 500 min manatdır. Agentliyin əmlakı nizamnamə fondundan, təsisçinin verdiyi əmlakdan, həmçinin dövlət büdcəsindən ayrılan vəsaitdən, fəaliyyətindən əldə olunmuş gəlirdən, ianələrdən, qrantlardan, cəlb edilən investisiyalardan və qanunla qadağan edilməyən digər vəsaitdən formalaşacaq.
Agentliyə rəhbərliyi və nəzarəti İdarə Heyəti həyata keçirir. İdarə Heyətinin tərkibi üç nəfərdən – nəqliyyat, rabitə və yüksək texnologiyalar nazirinin təqdimatı ilə Azərbaycan Respublikası Prezidentinin vəzifəyə təyin və vəzifədən azad etdiyi İdarə Heyətinin sədrindən və digər iki üzvündən ibarətdir.
Nəqliyyat, Rabitə və Yüksək Texnologiyalar Nazirliyi agentliyin fəaliyyətinə dair illik hesabatı dövlət başçısına təqdim edir.
İnnovasiyalar Agentliyinin strukturu agentliyin Aparatı, filialları, Yüksək Texnologiyalar Mərkəzi, İnnovasiya Mərkəzi, laboratoriyalar və inkubatorlardan ibarət olacaq.
İnnovasiyalar Agentliyi prezident İlham Əliyevin fərmanı ilə 2018-ci ilin noyabr ayında Nəqliyyat, Rabitə və Yüksək Texnologiyalar Nazirliyinin tabeliyində olan İnformasiya Texnologiyalarının İnkişafı Dövlət Fondunun və “Yüksək Texnologiyalar Parkı” MMC-nin əsasında yaradılıb.*
Ə.Məmmədov