“Formula 1” ilə müqavilənin müddətinin 2023-cü ilədək uzadılması Azərbaycana $50 mln.-a qənaət etməyə imkan verəcək. Bunu Bakı Şəhər Halqası Əməliyyat Şirkətinin Marketinq və İctimaiyyətlə Əlaqələr Departamentinin rəhbəri Nigar Arpadarai deyib.
"Məlum olduğu kimi, bu ilin əvvəlində Azərbaycan “Formula 1” yarışları ilə əməkdaşlığı daha 3 il müddətinə - 2023-cü ilədək uzadıb ki, bu da ölkəmizə 5 il ərzində $50 mln.-a qənaət etməyə imkan verəcək", - deyə N. Arpadarai bu gün “"Formula 1” yarışlarının sosial-iqtisadi faydaları" mövzusunda dəyirmi masada bildirib.
Onun sözlərinə görə, müqavilənin uzadılması Azərbaycana yeni gəlir mənbələri açmağa imkan verir. $50 mln.-a qənaət yeni gəlir mənbələri, sponsorluq və s. sayəsində mümkün olacaq.
N.Arpadarai qeyd edib ki, Azərbaycan 2016-2017-ci illərdə F-1 yarışlarının keçirilməsindən ümumilikdə $277,3 mln. gəlir əldə edib. Bunun $164,2 mln.-nu birbaşa gəlirlər təşkil edib. Yarışların keçirilməsində 1 min biznes strukturu iştirak edib, turizm, otel və nəqliyyat xidmətləri sahəsindən $22,7 mln. əldə edilib.
Departamentin rəhbəri deyib ki, Bakıda 3-4-5 ulduzlu otellərdə nömrələrin ümumi sayı 9,2 min təşkil edir. Digər otellərdə 6,554 min nömrə var ki, burada da “Formula 1” həvəskarları qalır", - deyə N.Arpadarai bildirib.
Öz növbəsində, BCC-nin kommersiya direktoru Bülent Özerdim qeyd edib ki, "Azərbaycan Qran Prisi" $100 mln.-a sığortalanıb.*
R.Babayev