ABŞ-ın Azərbaycandakı səfiri iki ölkə arasında turizmin inkişafında böyük imkanların olduğunu qeyd edir.
AZAL-ın prezidenti Cahangir Əsgərov bazar ertəsi ABŞ-ın Azərbaycandakı səfiri Örl Litzenberqer ilə görüşüb. Bu barədə şirkətdən məlumat verilib.
Görüşdə tərəflər iki ölkə arasında aviasiya sahəsində möhkəm tərəfdaşlıq münasibətlərindən məmnunluq ifadə ediblər.
C.Əsgərovun sözlərinə görə, Azərbaycanda müasir nəqliyyat infrastrukturu yaradılıb və nəqliyyat, tranzit və logistika sahələrində əməkdaşlığın daha da genişlənməsi üçün böyük potensial mövcuddur.
“Xüsusilə, ABŞ-ın ən iri aerokosmik korporasiyası “Boeing” “Azərbaycan Hava Yolları”nın strateji tərəfdaşıdır və AZAL-ın donanmasına müasir "787-8 Dreamliner” də daxil olmaqla bir neçə tipli “Boeing” təyyarələri daxildir. Bundan başqa, 2016-cı ilin iyun ayından etibarən Azərbaycan və Birləşmiş Ştatlar arasında “Açıq Səma” (Open Skies) sazişi qüvvədədir. Bu saziş sayəsində operatorlara sərnişin və yük aviadaşımaları üzrə daha əlverişli və səmərəli xidmətlər göstərilib”, - C.Əsgərov qeyd edib.
O, həmçinin bildirib ki, ABŞ Federal Aviasiya Administrasiyası Azərbaycan mülki aviasiyasının normativ bazasının təkmilləşdirilməsi sayəsində ölkəmiz üçün aviasiya təhlükəsizliyinin ən yüksək səviyyəsi – “A kateqoriyasını” təsdiq edib ki, bu da birbaşa Bakı - Nyu-York -Bakı aviareysini açmağa imkan verib.
Bundan başqa, “Silk Way” aviaşirkəti 2005-ci ildən etibarən həm ABŞ-ın özəl şirkətləri, həm də dövlət sektoru ilə işgüzar münasibətləri fəal inkişaf etdirir və möhkəmləndirir.
“Silk Way” aviaşirkəti ABŞ-ın müvafiq orqanları tərəfindən tanınan və sertifikatlaşdırılan aviadaşıyıcılardan biridir. US TRANSCOM (ABŞ Silahlı Qüvvələrinin Nəqliyyat Komandanlığı) ilə sıx əməkdaşlıq aviaşirkətə İraq və Əfqanıstan da daxil olmaqla, bütün mühüm istiqamətlər üzrə daşınma sifarişlərini yerinə yetirməyə imkan verib”, - C.Əsgərov vurğulayıb.
Öz növbəsində, Ö.Litzenberqer qeyd edib ki, mövcud böyük potensial və yaradılan şərait ölkələrimiz arasında turizmin inkişafında böyük imkanlar açır.
“ABŞ və Azərbaycan arasında münasibətləri, xüsusilə AZAL və “Silk Way” aviaşirkəti ilə əməkdaşlığı çox yüksək qiymətləndirirəm və səbirsizliklə turizmin inkişafında tərəqqi gözləyirəm”, - səfir bildirib. **
B.Rüstəmbəyov