Azərbaycan istehsalı olan “QFAB-250 LG” aviasiya bombası İstanbulda keçirilən “IDEF-2019” sərgisində ilk dəfə nümayiş etdirilib. Bu barədə Müdafiə Sənayesi Nazirliyinin məlumatında deyilir.
“Müdafiə Sənayesi Nazirliyinin müəssisələrində yaradılan “QFAB-250 LG” aviasiya bombasının inert nümunəsi İstanbulda keçirilən “IDEF-2019” sərgisində ilk dəfə nümayiş etdirilib və böyük maraqla qarşılanıb”, – deyə məlumatda bildirilir.
Lazer güdümlü, 250 kiloqram çaplı qəlpəli-fuqaslı aviasiya bombası Müdafiə Sənayesi Nazirliyinin Elmi-Tədqiqat İnstitutu ilə Türkiyənin “ASELSAN” şirkətinin birgə hazırladığı layihə əsasında yaradılıb.
Aviasiya bombasının 3 ədəd inert nümunəsi artıq hazırdır, bu nümunələrin sınaqlarının keçirilməsi planlaşdırılır. İnert nümunələrin sınaqları yekunlaşdıqdan sonra döyüş nümunələrinin sınaqlarının həyata keçirilməsi nəzərdə tutulur.
Uzunluğu 3300 mm, diametri 240 mm, kütləsi 270 kiloqram olan “QFAB-250 LG” aviasiya bombaları 12000 metrədək məsafədən hədəfi maksimum 10 metr sapma ilə vurmaq imkanı verəcək.
“QFAB-250 LG” aviasiya bombası NATO standartlarına uyğun yaradılıb.*
R.Babayev