Müdafiə Nazirliyi faşizm üzərində qələbənin 74-cü ildönümü münasibətilə Bakı şəhərinin müxtəlif yerlərində hərbi orkestrlərin nümunəvi çıxışları təşkil olunacaq.
“Tədbirlər mayın 9-da saat 17:00-dan 19:00-dək Bakının 6 rayonunda keçiriləcək”,- nazirliyin məlumatında deyilir.
Xüsusilə, tədbirlər Dənizkənarı Milli Parkda (Azadlıq meydanı qarşısında); Əhmədli qəsəbəsi Ukrayna dairəsi yaxınlığındakı Heydər Əliyev parkında; Zərifə Əliyeva parkında; Zabitlər parkında; Yasamal parkında (Lider TV yaxınlığında) və Fəvvarələr meydanında təşkil olunacaq.
Faşizm üzərində qələbənin 74-cü ildönümü münasibətilə mayın 9-da saat 12.00-da Azərbaycan Respublikası Müharibə, Əmək və Silahlı Qüvvələr Veteranları Təşkilatının həyətində qonaqlar üçün səhra əsgər mətbəxi açılacaq, Həzi Aslanov adına Azərbaycan Ordusunun İdeoloji və Mədəniyyət Mərkəzinin kollektivi, eləcə də hərbi orkestrin ifasında konsert proqramı təqdim ediləcək.
Naxçıvan, Gəncə, Şəmkir, Sumqayıt, Bərdə, Ağdam, Tərtər, Beyləqan, Lənkəran, Qusar və Xırdalan, şəhərlərində də mayın 9-u Faşizm üzərində qələbənin 74-cü ildönümü münasibətilə müxtəlif tədbirlərin keçirilməsi planlaşdırılır. **
F.İsazadə