Avqust ayının ikinci yarısında Azərbaycan Respublikası ilə Gürcüstan arasında dövlət sərhədinin delimitasiyası və demarkasiyası üzrə növbəti iclas keçirilə bilər. Bunu Azərbaycan Respublikası Prezidentinin sərhəd və Xəzər dənizi məsələləri üzrə xüsusi nümayəndəsi – xarici işlər nazirinin müavini Xələf Xələfov deyib.
“Biz komissiyanın növbəti iclasının avqust ayının ikinci yarısında keçirilməsini təklif etmişik. İclasın Gürcüstanda keçirilməsi nəzərdə tutulur”, - deyə X.Xələfov AZƏRTAC-a müsahibəsində bildirib.
Onun sözlərinə görə, Gürcüstan və Azərbaycan komissiyalarının işində uzun fasilələr olub və buna səbəb partnyorların tez-tez dəyişməsidir.
“Dövlət sərhədinin delimitasiyası üçün hər hansı dini-mədəni və sair qeyri-hüquqi faktlar əsas təşkil edə bilməz. Keşikçidağ mağaralar kompleksini əhatə edən sahə bütün mövcud hüquqi sənədlər, faktiki istifadə vəziyyətinə görə hər zaman Azərbaycan ərazilərinə aid olub. Bu, eyni zamanda, hələ 1963-cü ildə Gürcüstan SSR Ali Soveti tərəfindən təsdiq edilmiş topoqrafik növbətçi xəritələrdə öz əksini tapıb və SSRİ-nin süqutuna qədər tərəflər arasında inzibati sərhəd kimi qəbul edilib. Buna görə də hüquqi baxımdan qeyd edilən sahə ilə bağlı hər hansı mübahisədən və ya iddiadan söhbət gedə bilməz. Eyni zamanda, bu sahə də razılaşdırılmayan digər sahələr kimi delimitasiya çərçivəsində razılaşdırılmalı, iki dövlət arasında imzalanacaq dövlət sərhədinə dair müqavilədə təsbit olunmalıdır”, - deyə xarici işlər nazirinin müavini vurğulayıb.*
F.İsazadə