2019-cu ilin yanvar-avqust aylarında “Şahdəniz” yatağından hasil edilən qazın ixrac həcmi 6 mlrd. 587,3 mln. kubmetr təşkil edib ki, bu da ötən ilin müvafiq dövrünün göstəricisindən 31,9% çoxdur. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.
“Cari ilin yanvar-avqust aylarında Azərbaycanın magistral qaz kəmərləri ilə nəql edilən qazın 36,9%-i “Şahdəniz” yatağından hasil edilən qazın payına düşüb”, - Komitədən bildirilir.
Bütövlükdə, yanvar-avqust aylarında Azərbaycanın magistral qaz kəmərləri ilə 17 mlrd. 862,5 mln. kubmetr qaz nəql edilib (artım 18,8%).
2018-ci ildə “Şahdəniz” yatağından hasil edilən qazın ixrac həcmi 8 mlrd. 386,9 mln. kubmetr təşkil edib.
“Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları BP (operator – 28,8%), “Petronas” (15,5%), SOCAR (16,7%), LUKOİL (10%), NICO (10%) və TPAO (19%) şirkətləridir.
Hazırda “Şahdəniz” yatağından qaz hasilatı “Mərhələ-1” çərçivəsində “Alfa” və “Mərhələ-2” çərçivəsində “Bravo” platformalarından həyata keçirilir.**
N.Abbasova