Azərbaycanın qərbində qızıl təzahürlü “Ağyoxuş” və Tülallar” sahələrinin qızıl ehtiyatlarının potensialı 600 min unsiya qiymətləndirilir. Bu barədə “AzerGold” QSC-dən məlumat verilir.
“AzerGold”un yeni yataqların kəşfiyyatı və istehsalat sahələrinin genişləndirilməsi istiqamətində apardığı geoloji tədqiqat işləri nəticələrini verir. Xüsusilə, qızıl təzahürlü “Ağyoxuş” sahəsi, həmçinin Göygöl ayonunun cənubunda yerləşən “Tülallar” kəşfiyyat sahəsinin resurslarının ilkin hesablanması və səmərəliliyinin qiymətləndirilməsi məqsədilə cəlb edilən “Micon International” beynəlxalq məsləhətçi şirkəti tərəfindən adıçəkilən sahələrin qızıl ehtiyatlarının potensialı 600 min unsiya qiymətləndirilir”, - məlumatda qeyd olunur.
“AzerGold” tərəfindən həmin sahələrdə 2018-ci ildən etibarən intensiv geoloji kəşfiyyat işləri həyata keçirilir. Bu kəşfiyyat sahələri üzrə buruq-qazma işləri çərçivəsində ümumi dərinliyi 22 min metrdən çox olan 180 quyu qazılıb. Götürülmüş filiz nümunələri beynəlxalq akkreditasiyadan keçmiş laboratoriyalara geokimyəvi analiz testləri üçün göndərilib.
“Əldə olunan ilkin nəticələr əsasında “Micon International” tərəfindən ilkin ehtiyatlar hesablanıb və yerin təkində proqnozlaşdırılan ehtiyatların potensialı “Tülallar” sahəsi üzrə 500 min unsiya, “Ağyoxuş” sahəsi üzrə isə 100 min unsiya qiymətləndirilib. Bildirilib ki, bu sahələrin istismarından yüz milyonlarla dolları məbləğində gəlirin əldə olunması gözlənilir”, - məlumatda vurğulanır.
Qeyd edilən kəşfiyyat sahələrinin qısa müddətdə hasilata verilməsi üçün resursların beynəlxalq standartlara uyğun qiymətləndirilməsi, mədən layihələndirilməsi, metallurji və laborator tədqiqatlar və digər zəruri tədbirlər icra edilir.
“Ağyoxuş” və Tülallar” sahələrinin “Çovdar” yatağı yaxınlığında yerləşməsi hasilat zamanı “Çovdar” qızıl mədəninin texniki resurslarından istifadə etməyə imkan verəcək ki, bu da layihənin iqtisadi səmərəliliyini daha da artıracaq”, - məlumatda bildirilir.
“AzerGold” QSC prezident İlham Əliyevin 11 fevral 2015-ci il tarixli fərmanı ilə yaradılıb.
Cəmiyyət Qaradağ, Çovdar, Göydağ, Dağkəsəmən filiz sahələrinin, Köhnəmədən sahəsinin və Kürəkçay hövzəsi yataqlarının öyrənilməsi, tədqiqi, kəşfiyyatı, işlənməsi və idarə olunması ilə məşğul olur. **
N.Abbasova