“Azərkosmos” ASC 2019-cu ilin yanvar-sentyabr aylarında peyklərin kommersiya istismarından $30,2 mln. məbləğində gəlir əldə edib ki, bu da 2018-ci ilin müvafiq dövrünün göstəricisindən 81% çoxdur. Bu barədə İqtisadi İslahatların Təhlili və Kommunikasiya Mərkəzinin məlumatında deyilir.
“Yanvar-sentyabr aylarında “Azərkosmos” tərəfindən dünyanın 24 ölkəsinə xidmət ixrac edilib. Bu dövrdə xidmətin əsas həcmi ABŞ ($9 mln.), Fransa ($7,8 mln.), Böyük Britaniya ($5,8 mln.), Malayziya ($4,2 mln.) və BƏƏ-yə ($1 mln.) ixrac edilib”, - məlumatda bildirilir.
Hesabat dövründə “Azərkosmos”un ümumi gəlirlərinin 88%-ni xidmətlərin ixracından əldə olunan gəlirlər təşkil edib.
Xəbər verildiyi kimi, “Azərkosmos” ASC 2018-ci ildə peyklərin kommersiya istismarından $25,6 mln. məbləğində gəlir əldə edib.
“Azerspace-1” peyki 2013-cü il fevralın 9-da Kuru kosmodromundan (Cənubi Amerikanın şimal-şərqində, Fransa Qvianasında - İF) orbitə buraxılıb.
2014-cü ilin dekabr ayında “Azərkosmos” və Fransanın “Airbus Defence and Space” şirkətləri arasında “Azersky” peykinin “Azərkosmos”un mülkiyyətinə verilməsi haqqında müqavilə imzalanıb. Peyk 2014-cü ilin iyun ayında orbitə buraxılıb və 12 il orbitdə qalacaq.
“Azerspace-2” peyki 2018-ci ilin sentyabr ayında Kuru kosmodromundan orbitə buraxılıb. “Azərkosmos” ASC 2010-cu ildə telekommunikasiya peykinin orbitə çıxarılması, idarə olunması və istismar işlərinin həyata keçirilməsi üçün yaradılıb. Onun funksiyalarına peykin orbitə çıxarılması, telekommunikasiya xidmətlərinin göstərilməsi, xidmətlər almaq üçün sığorta şirkətlərinin seçiminin aparılması, kosmik (peyk) operatorlarla əməkdaşlığın qurulması, bu istiqamətdə müxtəlif tədqiqatların aparılması daxildir.**
B.Rüstəmbəyov