Şərur Sənaye Məhəlləsində bitki yağları istehsalı müəssisəsinin qurulması planlaşdırılır. Bu barədə Naxçıvan Muxtar Respublikası Ali Məclisinin sədri Vasif Talıbov məlumat verib.
“Dövlət büdcəsindən ayrılan 5 milyon manat məbləğində vəsait hesabına Şərur Sənaye Məhəlləsində artıq layihə-planlama işlərinə başlanılıb, qısa müddət ərzində investorların cəlbi ilə bağlı təkliflər vermişik. Demək olar ki, bu ilin sonuna artıq orada ilk müəssisənin qurulması işlərinə başlanılacaq”, - deyə o, bu gün Bakıda prezident İlham Əliyevlə görüşdə bildirib.
Ali Məclisin sədrinin sözlərinə görə, ilk olaraq bitki yağları istehsalı müəssisəsinin qurulması nəzərdə tutulub. Ona görə ki, muxtar respublikada bu, yüz faiz idxal hesabına həyata keçirilir.
V.Talıbov qeyd edib ki, xalça fabrikinin qurulması işləri başa çatdırılıb. İndi yun tədarükü sexinin qurulması işləri davam etdirilir. Bir-iki ay müddətində orada işlər tamamilə başa çatdırılacaq.
Prezident İ.Əliyev bu ilin sentyabr ayında Şərur Sənaye Məhəlləsinin yaradılması haqqında sərəncam imzalayıb.
Şərur Sənaye Məhəlləsinin yaradılmasında məqsəd Naxçıvan Muxtar Respublikasında sənaye sahəsində fəaliyyət göstərən mikro, kiçik və orta sahibkarların fəaliyyətinin dəstəklənməsi, qeyri-neft sektorunun davamlı inkişafının təmin edilməsi və əhalinin istehsal sahəsində məşğulluğunun artırılmasıdır.
Mikro, kiçik və orta sahibkarlığın dəstəklənməsi məqsədi ilə Şərur Sənaye Məhəlləsinin ərazisində qeyri-neft sənaye sahələri üzrə məhsul istehsalı müəssisələri, habelə xidmət müəssisələri yaradılır.
Şərur Sənaye Məhəlləsinin fəaliyyətinin təşkili, tənzimlənməsi, idarə olunması və inkişafı ilə bağlı tədbirləri Naxçıvan Muxtar Respublikası Nazirlər Kabinetinin müəyyən etdiyi idarəedici təşkilat həyata keçirir.
Şərur Sənaye Məhəlləsinin fəaliyyətinin təşkilini, həmin ərazinin istifadəyə yararlı vəziyyətə gətirilməsini, xarici və daxili infrastrukturun (elektrik və istilik enerjisi, qaz, su, kanalizasiya, rabitə, nəqliyyat, yanğından mühafizə, istehsal təyinatlı, inzibati, sosial və digər infrastruktur obyektləri) qurulmasını təmin etmək məqsədi ilə Naxçıvan Muxtar Respublikasının Nazirlər Kabinetinə dövlət büdcəsindən 5 milyon manat ayrılıb.*
B.Rüstəmbəyov