Azərbaycan və Səudiyyə Ərəbistanı qarşılıqlı biznes missiyaların təşkili məsələlərini müzakirə ediblər. Bu barədə Kiçik və Orta Biznesin İnkişafı Agentliyindən (KOBİA)məlumat verilir.
“Bu və qarşılıqlı maraq kəsb edən digər məsələlər Ər-Riyad şəhərində Azərbaycan-Səudiyyə Ərəbistanı əməkdaşlığı üzrə İşçi Qrupunun 4-cü iclası zamçanı müzakirə olunub”, - KOBİA qeyd edir.
O cümlədən, ədbirdə Azərbaycan və Səudiyyə Ərəbistanı arasında iqtisadi əməkdaşlığın genişləndirilməsinə, hər iki ölkənin KOB-larının iştirakı ilə birgə tədbirlərin təşkilinə, iqtisadiyyatın müxtəlif sahələri üzrə qarşılıqlı məlumat mübadiləsinə, Səudiyyə Ərəbistanının müvafiq qurumlarının Agentliyin strukturuna daxil olan KOB İnkişaf Fondunda iştirak imkanlarına, qarşılıqlı biznes missiyaların təşkilinə dair müzakirələr aparılıb.
İclasın sonunda Azərbaycan-Səudiyyə Ərəbistanı əməkdaşlığı üzrə İşçi Qrupunun 4-cü iclasının yekunlarına dair Protokol imzalanıb. Sənədi İşçi Qrupun həmsədri, KOBİA-nın İdarə Heyətinin sədri Orxan Məmmədov və SAGİA-nın sədr müavini İbrahim Al-Suavi imzalayıblar.
İşçi Qrupu Azərbaycan Respublikası Hökuməti ilə Səudiyyə Ərəbistanı Krallığı Hökuməti arasında iqtisadiyyat, ticarət, investisiya, texnika, mədəniyyət, idman və gənclər sahələrində əməkdaşlıq üzrə Müştərək Komissiya çərçivəsində fəaliyyət göstərir.
İşçi Qrupunun iclası çərçivəsində KOBİA nümayəndə heyəti Səudiyyə Ərəbistanının KOB-lara xidmət və dəstək göstərən bir sıra qurumlarında görüşlər keçirib. Görüşlərdə birgə müəssisələrin yaradılmasına, hər iki ölkənin KOB-larının iştirakı ilə Biznes Şurasının yaradılması, birgə tədbirlərə dair yol xəritəsinin hazırlanması barədə razılıq əldə edilib. **
B.Rüstəmbəyov