İndiyədək Azərbaycan digər ölkələrin iqtisadiyyatına $20 milyarddan artıq sərmayə qoyub. Bunu Azərbaycan prezidenti İlham Əliyev çərşənbə axşamı Azərbaycan-Ukrayna biznes forumunda bildirib.
“Beynəlxalq İnkişaf Assosiasiyasının hesabatına görə Azərbaycan təmiz donor ölkəsinə çevrilibdir. Yəni, biz indi borc alan ölkə deyil, borc verən ölkəyik. Biz özümüz də xarici ölkələrə sərmayə qoyuruq. Bu sərmayələr 20 milyard dollardan artıqdır”, - Əliyev deyib.
Həmçinin president qeyd edib ki, Azərbaycanın təşəbbüsü ilə bölgədə çox önəmli enerji və nəqliyyat layihələri həyata keçirildi. “Bu layihələrin həyata keçirilməsində xarici banklar, Avropa bankları, Asiya bankları bizə öz maliyyə dəstəyini göstərdi”, - Əliyev bildirib.
“Xarici borcumuz çox aşağı səviyyədədir, ümumi daxili məhsulun cəmi 17%-ni təşkil edir. Bu göstəriciyə görə Azərbaycan dünyada doqquzuncu yerdədir. Bizim valyuta ehtiyatlarımız xarici borcumuzdan beş dəfə artıqdır. Yəni, biz istənilən vaxtda xarici borcu sıfırlaya bilərik”, - dövlət başçısı vurğulayıb.
“Mən sərmayə qoyuluşunu qeyd etdim, eyni zamanda, həm Azərbaycanda, həm də Ukraynada turizm sahəsində böyük imkanlar var. Bizim ölkələrimizin çox zəngin, füsunkar təbiəti, inkişaf etmiş infrastrukturu var, ona görə bu sahəyə də diqqət yetirilməlidir”, - Əliyev bəyan edib.
Preizident bildirib ki, kənd təsərrüfatında əməkdaşlıq uğurla davam etdirilə bilər.” Bugünkü əməkdaşlığın səviyyəsi, əlbəttə ki, bizi qane edə bilməz. Bütövlükdə bütün sahələrdə biz əməkdaşlığa açığıq və hesab edirəm ki, səfərin (Ukrayna prezidentinin - İF) bu məsələlərin həllində çox önəmli rolu olacaq”, - Əliyev qeyd edib.
“Beləliklə, qarşılıqlı ticarətin təşviqi üçün çox önəmli addımlar atılacaq. Eyni zamanda, hesab edirəm ki, biz sərmayə qoyuluşu məsələlərində yeni mərhələyə qədəm qoya bilərik. Son 15 il ərzində Azərbaycana 270 milyard dollar sərmayə qoyulub. Bu sərmayənin yarısı xarici sərmayədir”, - Əliyev vurğulayıb. **
X.Nəsirzadə