2020-ci ildə Aqrar Kredit və İnkişaf Agentliyinin (AKİA) kredit portfelinin 150 milyon manatadək artırılması planlaşdırılır. Bunu “İnterfaks-Azərbaycan”a AKİA-nın sədri Mirzə Əliyev deyib.
“2020-ci ildə kredit portfelini 150 milyon manatadək artırmaq planlaşdırlır, verilən güzətşli kreditlərin həcmi isə 40 milyon manat təşkil edəcək”, - Əliyev bildirib.
O, həmçinin məlumat verib ki, 2019-cu ildə Agentliyin kredit portfeli 2018-ci llə müqayisədə 50% artaraq 118,105 milyon manata çatıb.
“Biz 2018-ci ildə 169 fermerə 10,9 milyon manat məbləğində güzəştli kredit ayırmışıq. 2019-cu ilodə güzəştli kredit əldə edən fermerlərin sayı 717-yə çatıb, kreditləşmənin həcmi 20,859 milyon manat təşkil edib”, - AKİA-nın sədri məlumat verib.
Prezident İlham Əliyev 2018-ci ilin dekabr ayında “Aqrar Kredit və İnkişaf Agentliyinin vəsaitindən istifadə Qaydası”nı təsdiq edib.
Agentliyin vəsaitindən istifadə istiqamətləri bunlardır: kənd təsərrüfatı məhsullarının istehsalı, emalı, saxlanması və satışı proseslərinin təkmilləşdirilməsi ilə bağlı layihələrin maliyyələşdirilməsi; regionların aqrar inkişafı ilə bağlı innovativ layihələrin maliyyələşdirilməsi; kənd təsərrüfatı istehsal vasitələrinin təchizatının yaxşılaşdırılması ilə bağlı layihələrin, həmçinin onların güzəştli satışının və lizinqinin maliyyələşdirilməsi; heyvandarlıq təsərrüfatlarının dövlət-özəl tərəfdaşlığı tətbiq edilməklə inkişafı sahəsində layihələrin maliyyələşdirilməsi; Kənd Təsərrüfatı Nazirliyinin pilot layihələrinin maliyyələşdirilməsi.
Vəsaitdən istifadə şərtləri müvəkkil kredit təşkilatları ilə agentlik arasında bağlanan müqaviləyə əsasən tənzimlənir. Hər bir müvəkkil kredit təşkilatı üçün müəyyən edilən kredit xəttinin maksimum həcmi 5 mln. manatdır. Müvəkkil bankların agentlikdən cəlb etdikləri vəsaitin ümumi məbləğinin qalığı onların məcmu kapitalının, bank olmayan kredit təşkilatlarının isə nizamnamə kapitalının 100 faizinədək ola bilər.
Sahibkarlıq subyektlərinə agentliyin vəsaiti hesabına aşağıdakı hədlərdə güzəştli kreditlər verilə bilər: 5 000 manatadək - mikrokreditlər; 5 001 manatdan 30 000 manatadək – kiçik həcmli kreditlər; 30 001 manatdan 100 000 manatadək – orta həcmli kreditlər; 100 001 manatdan 200 000 manatadək – iri həcmli kreditlər; 1 000 000 manatadək - kənd təsərrüfatı istehsal vasitələrinin alınması üçün kreditlər.
Güzəştli kreditlərin müddətləri aşağıdakı kimi müəyyən edilir: mikrokreditlər üçün - 2 ilədək; kiçik və orta həcmli kreditlər üçün - 3 ilədək; iri həcmli kreditlər üçün - 5 ilədək.
Kreditlər üzrə güzəşt müddəti aşağıdakı kimi müəyyən edilir: mikrokreditlər üçün - 12 ayadək; kiçik və orta həcmli kreditlər üçün - 18 ayadək; iri həcmli kreditlər üçün - 24 ayadək.
Agentlik vəsaiti müvəkkil kredit təşkilatlarına illik 2 faiz tətbiq etməklə verir. Müvəkkil kredit təşkilatlarının agentliyin kredit vəsaitinə tətbiq etdiyi illik faiz dərəcəsinin ən yüksək həddi 7 faizdən artıq olmamalıdır.**
B.Rüstəmbəyov