2019-cu ildə Dövlət Gömrük Komitəsi tərəfindən ölkəyə idxal zamanı $900 milyon məbləğində malların dəyərini aşağı salmaq cəhdlərinin qarşısı alınıb. Bunu Dövlət Gömrük Komitəsinin sədri Səfər Mehdiyev deyib.
“Gördüyümüz işlər nəticəsində kölgə iqtisadiyyatı ilə bağlı mübarizə və risklərin idarə edilməsi mərkəzi tərəfindən məlumatların əvvəlcədən sistemə ötürülməsi ilə şəffaflıq təmin olunmuş, xüsusilə də digər ölkələrdən, ixracatçı ölkələrdən məlumatların sistemə daxil olması ilə sahibkarların qiymət azaltma tendensiyası 2019-cu ildə azalıb. Bu sahədə aparılan ciddi nəzarət funksiyalarına baxmayaraq, yenə də 900 milyon dollara yaxın malların dəyərini aşağı salmağa cəhdlər edilmişdir, bunun qarşısı alınmış və 300 milyondan artıq (valyutanı qeyd etməyib - İF) əlavə vəsaitin dövlət büdcəsinə köçürülməsi təmin edilib”, - Mehdiyev bazar ertəsi Azərbaycan prezidenti İlham Əliyevin yanında 2019-cu ilin yekunlarına həsr olunmuş müşavirədə bildirib.
Həmçinin, Mehdiyev məlumat verib ki, 2019-cu ildə gömrük orqanları dövlət büdcəsinə vergi və rüsum köçürülməsi planını 19,1% artıq icra ediblər. “2019-cu il ərzində vergitutma bazası əvvəlki illərlə müqayisədə eyni səviyyədə qalmışdır. Belə ki, idxal mallarına 50% həcmində vergi imtiyazı verilib, ümumiyyətlə, güzəştlər tətbiq olunur. Azərbaycan Respublikasına idxal olunan mallara tətbiq edilən gömrük rüsumları üzrə azadolmanın həcmi 65%, idxal olunan mallara tətbiq edilən əlavə dəyər vergisinin azadolmanın həcmi isə 35% təşkil edib”, - o bildirib. **
B.Rüstəmbəyov