İpoteka və Kredit Zəmanət Fondu 2020-ci ildə kirayə mexanizminin fəaliyyətə başlamasını təmin etmək niyyətindədir. Bu barədə “İnterfaks-Azərbaycan”a İKZF-dən məlumat verilir.
“Fond tərəfindən kirayə mənzil mexanizminin həyata keçirilməsini təmin etmək məqsədilə hazırlıq işləri həyata keçirilib. Artıq mexanizm çərçivəsində mənzil fondu yaradılıb, mexanizmin fəaliyyətini təmin etmək üçün zəruri prosedur və daxili qaydalar hazırlanaraq kirayəçilərə və yaşayış sahələrinə dair tələblər müəyyən edilib”, - İKZF-dən qeyd ediblər.
Fonddan bildirilir ki, mexanizmlə bağlı iş prosesləri tam avtomatlaşdırılıb.
“Şəffaflığın və operativliyin təmin edilməsi məqsədilə vətəndaşlara “ASAN Xidmət” Mərkəzləri vasitəsilə xidmət göstəriləcək”, - İKZF-dən məlumat verilir.
2019-cu il yanvar ayında Azərbaycan prezidenti “Azərbaycan Respublikası İpoteka və Kredit Zəmanət Fondunun yaşayış sahələrini satmaq öhdəliyi ilə kirayəyə verməsi Qaydası” təsdiq edib.
Təsdiq edilmiş qayda ilə Fond tərəfindən yaşayış sahələrinin satmaq öhdəliyi ilə kirayəyə verilməsi ilə bağlı müvafiq mexanizmin yaradılması nəzərdə tutulub. Eyni zamanda, satmaq öhdəliyi ilə kirayəyə vermək məqsədilə yaşayış sahələrinin satın alınmasını Fond aşağıdakı mənbələr hesabına həyata keçirir: Fondun kapitalı və emissiya etdiyi istiqrazlardan daxil olan vəsait.
Yaşayış sahəsinin alınmasını və satmaq öhdəliyi ilə kirayəyə verilməsini Fond aşağıdakı şərtlərə riayət etməklə həyata keçirir: kirayəçi Azərbaycan Respublikasının vətəndaşı olmalıdır və müraciət tarixinə kirayəçinin vaxtı keçmiş öhdəlikləri olmamalıdır. Kirayə müqaviləsi 3 ildən 25 ilədək müddətə bağlanmalı və notariat qaydasında təsdiqlənməlidir.
Kirayə müqaviləsi bağlanıldıqdan sonra kirayəçi aylıq ödənişin ən azı bir ilini qabaqcadan ödəməlidir, kirayə müqaviləsi bağlanıldıqdan sonra alış qiymətinin tam ödənişi 3 ildən tez həyata keçirilməməlidir.
Müraciətlər növbəlilik əsasında qeydiyyata alınır və baxılır. Müraciət edən şəxsə qeydiyyat nömrəsi elektron sistem vasitəsilə verilir. **
Ə.Məmmədov