Azərbaycan Dövlət Neft Şirkəti (SOCAR) cümə günü şirkətin istiqrazlarının sahiblərinə 13-cü dəfə faizlər üzrə $1,25 mln. məbləğində ödəniş həyata keçirib. Bu barədə "SOCAR Capital" şirkətinin məlumatında deyilir.
Məlumata əsasən, qeyd olunan qiymətli kağızların sahiblərinin qazancı indiki ödəniş də nəzərə alınmaqla $16,25 mln. təşkil edib.
“İstiqrazlar üzrə növbəti faiz ödənişi 17 aprel 2020-ci il tarixində baş tutacaq”, - şirkətdən vurğulanıb.
Qeyd olunur ki, SOCAR istiqrazlarının təkrar bazar əməliyyatlarının ümumi həcmi hazırda $185 mln.-a çatıb. Bağlanmış əqdin sayı 2 mini ötüb.
“Bakı Fond Birjasında ən çox ticarət olunan korporativ maliyyə alətinə çevrilməsi və REPO əməliyyatlarının $34 milyona yaxınlaşması SOCAR İstiqrazlarına olan yüksək tələbatdan xəbər verir. Bütün bu qeyd olunan göstəricilərin ümumi nəticəsidir ki, cari il ərzində yeni istiqrazların buraxılması planlaşdırılır və müvafiq yöndə hazırlıq işləri davam etdirilir”, - məlumatda qeyd edilir.
SOCAR-ın daxili bazar üçün nəzərdə tutulan istiqrazları 2016-cı ilin sentyabr ayında 100 mln. dollarlıq həcmdə buraxılıb. Şirkətin istiqrazlarına tələb $203,4 miyonu ötüb.
Emissiya bir qiymətli kağızın nominal dəyəri $1 min olan 100 min ədəd istiqraza bölünüb. Kağızların buraxılmasında məqsəd şirkətin maliyyə kanallarının şaxələndirilməsi və əhali üçün yeni investisiya imkanlarının yaradılmasıdır.
SOCAR istiqrazları üzrə gəlirlilik ildə 5% təşkil edir və faizləri hər 3 aydan bir ödənilir.
İstiqrazların dövriyyədə olduğu 5 il ərzində ümumi gəlir $25 mln. təşkil edəcək. **
N.Abbasova