2020-ci il fevral ayından etibarən “Azərkosmos” ASC Rusiyanın “Yuveliroçka” və “TNV Planet” kanallarını “Azerspace-1” peyki vasitəsilə yayımlayacaq. Bu barədə cəmiyyətin məlumatında deyilir.
“Azərkosmos” və Rusiyanın “VES-Media” (ВЕС-Медиа) şirkətinin “Yuveliroçka” kanalı və Tatarıstan Respublikasının “Novıy Vek” tele-radio şirkətinin “TNV Planet” kanalları arasında əməkdaşlıq müqaviləsi imzalanıb. Müqaviləyə əsasən, fevral ayından etibarən “Yuveliroçka” və “TNV Planet” kanalları “Azerspace-1” peyki vasitəsilə yayımlanacaq. Yeni kanallar sayəsində hazırda “Azerspace-1” peykində nümayiş olunan rusdilli kanalların sayı artacaq və bu da regionda rusdilli kanallara olan tələbatı qarşılamaqla “Azerspace-1” peykinin orbital mövqeyinin daha da populyarlaşması üçün əlavə imkanlar yaradacaq”, - məlumatda qeyd olunur.
“Azərkosmos”un məlumatına görə, müqavilələr Moskvada keçirilən “CSTB 2020” sərgi-forumu çərçivısində imzalanıb.
“Azərkosmosla qurulan əməkdaşlığımız sayəsində “Yuveliroçka” kanalı nəinki Rusiya və MDB məkanında, o cümlədən “Azerspace-1” peyki vasitəsilə 30-dan çox ölkədə yayımlanacaq. Biz inanırıq ki, bu kanala Azərbaycanlı izləyicilərin də marağı yüksək olacaq. “Azərkosmos” ilə bu əməkdaşlığımızın uzunmüddətli olacağına əminik”, - məlumatda “VES-Media” şirkətinin distributor meneceri Yuliya Averkinanın sözlərindən sitat gətirilir.
“Azerspace-1” peyki 2013-cü il fevralın 9-da Kuru kosmodromundan (Cənubi Amerikanın şimal-şərqində, Fransa Qvianasında - İF) orbitə buraxılıb.
“Azərkosmos” ASC 2010-cu ildə telekommunikasiya peykinin orbitə çıxarılması, idarə olunması və istismar işlərinin həyata keçirilməsi üçün yaradılıb. Onun funksiyalarına peykin orbitə çıxarılması, telekommunikasiya xidmətlərinin göstərilməsi, xidmətlər almaq üçün sığorta şirkətlərinin seçiminin aparılması, kosmik (peyk) operatorlarla əməkdaşlığın qurulması, bu istiqamətdə müxtəlif tədqiqatların aparılması daxildir.
“Azərkosmos” ASC 2019-cu ildə peyklərin kommersiya istismarından $43,4 milyon məbləğində gəlir əldə edib ki, bu da 2018-ci ilin göstəricisindən 69,5% çoxdur. **
N.Abbasova