Prezident İlham Əliyev İtaliya şirkətlərini Azərbaycanın aqrar-sənaye kompleksinin inkişafında fəal şəkildə iştirak etməyə dəvət edib. Bu barədə dövlət başçısının saytında məlumat verilir.
“İtaliya şirkətlərinin kənd təsərrüfatı sahəsində çox böyük təcrübəsi var. Şirkətlərin bəziləri Azərbaycanda fəaliyyət göstərir. Hətta bir İtaliya şirkəti Azərbaycanda şərabçılığın inkişafı ilə məşğul olur və çox uğurla məşğul olur. O şirkətin istehsal etdiyi məhsul xarici bazarlara da ixrac edilir. İtaliyanın zeytunçuluq sahəsində böyük təcrübəsi var. Azərbaycan artıq zeytun yağlarını ixrac etməyə başlamışdır. Biz İtaliya şirkətlərini bu sahəyə məsləhətçi və podratçı kimi dəvət edirik. O cümlədən Azərbaycan İtaliyaya fındığın ixracı ilə məşğuldur və bilirəm ki, İtaliya şirkətlərinin bu sahəyə böyük marağı var. Biz onları dəvət edirik ki, Azərbaycanda bu və digər sahələri bizimlə bərabər inkişaf etdirsinlər”, - deyə İ.Əliyev bu gün Romada keçirilən İtaliya-Azərbaycan biznes forumunda çıxışı zamanı bildirib.
Onun sözlərinə görə, əsas vəzifə iki ölkə arasında ticarət əlaqələrinin şaxələndirilməsidir. Prezident nəqliyyat, kosmik sənaye, hərbi-texniki, turizm və mədəniyyət sahələrində gələcək əməkdaşlıq üçün perspektivlərin olduğunu vurğulayıb.
“Kosmik sənaye də çox perspektivli sahədir. Azərbaycanın artıq 3 peyki vardır. İtaliyanın bu sahədə əldə etdiyi təcrübə bizim üçün çox maraqlıdır. Mən dünən imzalanmış sənədlər arasında birini də xüsusi qeyd etmək istərdim. Bu, hərbi sənaye kompleksinə aiddir. İmzalanmış memorandum əsasında bu əməkdaşlığa start verilir. Əminəm ki, bu ilin sonuna qədər bütün lazımi texniki və kommersiya şərtləri razılaşdırılacaq və beləliklə, biz hərbi sənaye sahəsində uğurla əməkdaşlıq edəcəyik”, - deyə İ.Əliyev bildirib.
O deyib ki, Azərbaycan üçün infrastruktur layihələri prioritet təşkil edir və İtaliya şirkətlərini bu layihələrdə, eləcə də Azərbaycanın maliyyə dəstəyi ilə üçüncü ölkələrdə reallaşdırılan layihələrdə iştiraka dəvət edib.
İ.Əliyev, həmçinin sənaye, bərpaolunan energetika və ekologiya sahələrində də əməkdaşlıq üçün yaxşı imkanların olduğunu diqqətə çatdırıb.*
Ə.Məmmədov