Azərbaycan prezidenti İlham Əliyev İsmayıllı və Neftçala rayonlarının yeni təyin olunan icra başçılarına rayonlarda vəziyyəti təhlil etməyi və əhalinin problemlərini öyrənməyi tapşırıb.
Cümə axşamı İlham Əliyev Nahid Bağırovu İsmayıllı Rayon İcra Hakimiyyətinin başçısı, Mirhəsən Seyidovu Neftçala Rayon İcra Hakimiyyətinin başçısı vəzifələrinə təyin olunmaları ilə əlaqədar qəbul edib. Bu barədə dövlət başçısının saytında məlumat verilir.
“ilk növbədə, rayonlarda vəziyyət təhlil edilməlidir. İnsanları narahat edən məsələlər ciddi araşdırılmalıdır və onların həlli yolları ilə bağlı təkliflər hazırlanmalıdır, yaxud da ki, bu məsələlər yerində öz həllini tapmalıdır”, - prezident deyib.
O vurğulayıb ki, əgər işlər düzgün qurularsa, rayonların potensialı kifayət qədər böyük ola bilər.
“Neftçala rayonunda sənaye zonası yaradılıb. Deyə bilərəm ki, rayonların arasında birinci sənaye zonası Sumqayıtdan sonra Neftçala şəhərində yaradılıb və artıq fəaliyyətə başlayıb. Azərbaycanda avtomobillər Neftçalada istehsal olunur və bu sənaye zonasının gələcək inkişafı ilə bağlı konkret təkliflər verilməlidir. Hesab edirəm ki, Neftçalada balıqçılıq sənayesinin çox böyük perspektivləri var”, - dövlət başçısı qeyd edib.
Prezident təəssüflə bildirib ki, baxmayaraq ki, Azərbaycan Xəzər dənizinin sahillərində yerləşir, ölkə özünü balıqla təmin edə bilmir, idxaldan asılıdır. “Eyni zamanda, balıqçılıq təsərrüfatlarının yaradılması geniş vüsət almayıb. Mövcud olan təsərrüfatların böyük hissəsi çox primitiv səviyyədədir. Ona görə balıqçılıq həm bizim qeyri-neft sektorumuzun önəmli sahəsi ola bilər, eyni zamanda, ixracyönümlü sahə ola bilər və olmalıdır. Ona görə investorları bu sahəyə cəlb etmək üçün mütləq işlər aparılmalıdır”, - Əliyev vurğulayıb.
Prezident qeyd edib ki, Neftçala rayonunun turizm potensialı da çox perspektivli ola bilər. “Bu günə qədər rayonda turizmlə bağlı demək olar ki, heç bir iş görülməyib. Halbuki Bakıya o qədər də uzaq deyil, yaxşı yollar da çəkilir. Hesab edirəm ki, orada da turizm infrastrukturunun yaradılmasına ehtiyac var”, - Əliyev deyib.
İsmayıllı rayonunun gələcək inkişafına toxunan İlham Əliyev bildirib ki, İsmayıllı rayonunun əsas inkişaf potensialı turizm və kənd təsərrüfatı ilə bağlıdır. **
B.Rüstəmbəyov