Prezident İlham Əliyev hazırda səfərbərliyin elan edilməsinə ehtiyac olmadığını bildirib.
"Bu gün səfərbərliyin elan edilməsinə heç bir ehtiyac yoxdur. Əgər lazım gələrsə, bu da olacaq. Bu gün Azərbaycan Ordusu tam komplektləşdirilib", - deyə Əliyev bu gün bildirib.
Dövlət başçısı qeyd edib ki, Ermənistan-Azərbaycan sərhədində döyüşlər şəraitində Azərbaycan vətəndaşlarını orduya yazılmağa çağırıb. "Heç bir həftə keçməyib, artıq əlli minə yaxın insan yazılıb. Əlli minə yaxın Azərbaycan vətəndaşı, - onların mütləq əksəriyyəti gənclərdir, - Vətəni qorumaq üçün artıq Səfərbərlik və Hərbi Xidmətə Çağırış üzrə Dövlət Xidmətinə müraciət edib, öz adlarını, ünvanlarını veriblər. Mən onlara təşəkkür edirəm. Budur, bu gün Qarabağda ölümə getməyə hazır olan Azərbaycan gənci. Mən bir daha onlara, onların valideynlərinə təşəkkürümü bildirirəm. Onlar xalqımız, dövlətimiz üçün dəyərli övladlar yetişdiriblər", - deyə İ.Əliyev əlavə edib.
Əliyev dünya birliyinin, bir çox beynəlxalq təşkilatların Ermənistanla sərhəddə son döyüşlərdə Azərbaycanı dəstəklədiyini vurğulayıb.
Prezident qeyd edib ki, Azərbaycan Ermənistanın sərhəddə törətdiyi təxribata layiqli cavab verə bilib. “Ermənistan ordusu Tovuz istiqamətində bizim mövqelərimizi, torpaqlarımızın bir hissəsini zəbt etmək üçün namərdcəsinə, qəflətən artilleriya silahlarında hücum təşkil edib və bunun nəticəsində hərbçilərimiz həlak olub, yaralanıb. Dərhal lazımi tədbirlər görülüb və qisas əməliyyatı keçirilib. Qisas əməliyyatı nəticəsində onlarla düşmən, onların texnikası məhv edilib”, - deyə o bildirib.
Əliyev əlavə edib ki, Azərbaycan erməni təcavüzünün qarşısını almaq üçün müasir silahlar alır. "Bu silahlar Azərbaycanda istehsal olunmur. Bu silahların qiyməti çox yüksəkdir. Bizim maddi imkanlarımız olmasa, biz onu edə bilməzdik", - deyə prezident vurğulayıb.*
X.Nəsirzadə, A.Əzizov