Azərbaycan prezidenti İlham Əliyev 2019-cu ildə ölkənin quraqlıq ilə üzləşməsinə gətirən su ehtiyatlarının paylanması ilə məşğul olan aidiyyəti qurumların passiv fəaliyyətindən son dərəcə narazılıq ifadə edib.
“Keçən il yaşanan quraqlıq onu göstərdi ki, biz bu böhranlı vəziyyətə hazır deyilik. Böhranlı vəziyyətdə nə etməyin lazım olduğunu aidiyyəti qurumlar düzgün müəyyən edə bilməyiblər. Ona görə keçən il biz vaxt itirmişik. Əgər aidiyyəti qurumlar keçən il fəal işləsəydilər, günahı bir-birinin üstünə yıxmasaydılar və təxirəsalınmaz tədbirlər görsəydilər, bu gün biz bu problemlərlə üzləşməyəcəkdik. Bu problemlər həm insanların sağlamlığına, həm də kənd təsərrüfatının inkişafına mənfi təsir göstərir. Çünki su həyat deməkdir. İlk növbədə, insanların sağlamlığı böyük dərəcədə təmiz içməli sudan asılıdır”, - Əliyev cümə axşamı su təsərrüfatının vəziyyətinə həsr olunmuş videoformatda müşavirədə bildirib.
Dövlət başçısı qeyd edib ki, Prezident Administrasiyasına fermerlərdən onlarla məktublar daxil olur. Həmin məktublarda qeyd olunur ki, quraqlıq və bəzi hallarda aidiyyəti qurumların laqeyd münasibəti nəticəsində çox ciddi problemlər yaranıb.
“Biz bu məsələləri kompleks şəkildə həll etməliyik ki, gələcəkdə təbii problemlərin yaratdığı xoşagəlməz mənzərəyə və çətinliklərə hazır olaq”, - prezident deyib.
Prezident bu məsələdə digər problem kimi investisiya proqramların reallaşdırılmasında kobud səhvləri qeyd edib.
“İnvestisiya proqramına ciddi nəzarət yox idi, nəyi sifariş edirdilər, onu da verirdilər. Bəs sonra necə xərclənirdi? Buna son qoyulmalıdır. Bundan sonra bu işlər yalnız koordinasiya şəklində aparılmalıdır”, - Əliyev bəyan edib. **
X.Nəsirzadə