Martın 15-dən “Azərbaycan Hava Yolları” QSC Covid-19 koronavirus səbəbindən 23 mindən artıq Azərbaycan vətəndaşını vətənə gətirib. Bunu AZAL-ın prezidenti Cahangir Əsgərov deyib.
“Martın 15-dən hazırkı vaxtadək 239 beynəlxalq reys yerinə yetirilərək 23 mindən artıqhəmyerlimiz vətənə çatdırılıb”, - Əsgərov çərşənbə axşamı mülki aviasiya və turizm sektorunun rəhbərliyi ilə görüşdə bildirib.
O, həmçinin xatırladıb ki, AZAL və bəzi xarici aviaşirkətlər pandemiya dövründə Bakıdan tələbatın daha yüksək olduğu istiqamətlər – İstanbul, London, Berlin, Dubay və Minsk istiqamətlərində xüsusi beynəlxalq reyslər yerinə yetirməyə başlayıblar.
“Karantin rejiminin uzadılması və sərhədlərin 2020-ci ilin 31 avqust tarixinədək bağlanması səbəbindən Azərbaycanın bütün hava limanları müntəzəm sərnişin aviareyslərinin yerinə yetirilməsi üçün bağlıdır. Bununla belə, AZAL xüsusi aviareyslərin yerinə yetirilməsinə başlanması üçün Rusiya daxil olmaqla, bir sıra dövlətlərlə danışıqları davam etdirir”, . Əsgərov məlumat verib
O bildirdi ki, görüş ərəfəsində keçirilən videokonfrans zamanı səsləndirilən turizm şirkətlərinin arzularını nəzərə alaraq Azərbaycanın milli aviadaşıyıcısı birbaşa agentləri üçün avqustun 1-dən etibarən Qlobal distribyutor sistemi (GDS) vasitəsilə Azərbaycan ərazisində oflayn satışı açacaq.
“Bu zaman anlamaq lazımdır ki, turizm operatorlarının əsas gəlir mənbəyi təkcə aviabilet satışı deyil, bütün dünyada olduğu kimi, hazır turizm paketlərinin satışı olmalıdır. Digər ölkələrin təcrübələrinə əsaslanaraq, ilk növbədə, pandemiyadan sonrakı dövrdə daxili turizmin inkişafına diqqəti yönəltmək lazımdır, AZAL isə Azərbaycanı xarici turistlərin səfəri üçün daha əlçatan edəcək”, - Əsgərov bildirib. **
N.Abbasova