Azərbaycan hökuməti növbəti 10 il ərzində ÜDM-ni iki dəfə artırmağı planlaşdırır.
"Növbəti onillikdə ölkəmizdə sosial-iqtisadi rifahın yüksəldilməsi üçün iqtisadiyyatın ikiqat artımının təmin edilməsi qarşıda duran başlıca strateji çağırışlardan biridir. Xüsusilə postpandemiya dövründə iqtisadiyyatın illik artım tempinin yüksəldilməsi üçün onun yeni mexanizmlərinin formalaşdırılması və inkişaf etdirilməsi, bu məqsədlə daha dayanıqlı və inklüziv iqtisadi artım mənbələrinin yaradılmasına, xüsusilə özəl investisiyaların, o cümlədən birbaşa xarici investisiyaların cəlbinə, qeyri-neft ixracının genişləndirilməsinə əsaslanan milli inkişaf prioritetlərinin müəyyən edilməsi təmin olunmalıdır”, - deyə hökumətdən “İnterfaks-Azərbaycan” agentliyinə bildirilib.
Milli iqtisadi inkişaf qarşısında duran strateji çağırışlara adekvat cavab vermək, yeni iqtisadi artım və inkişaf modelinə uğurlu keçidi təmin etmək, bunun üçün iqtisadi siyasət və iqtisadi islahatlar çərçivəsini formalaşdırmaq məqsədilə ölkədə iqtisadi siyasətin yeni strateji idarəetmə çərçivəsinin yaradılması tələb olunur.
“İqtisadi siyasətin yeni idarəetmə çərçivəsi postpandemiya dövründə ölkənin sosial-iqtisadi inkişafının sürətləndirilməsini və milli iqtisadiyyatın müasirləşdirilməsini hədəfləyən strategiyanın formalaşdırılmasını, xüsusilə onun vacib hissəsi olan iqtisadi islahatlar proqramının hazırlanmasını və uğurla həyata keçirilməsini təmin etməlidir”, - deyə hökumətdən qeyd ediblər.
Prezident İlham Əliyev sentyabrın 9-da İqtisadi Şuranın yaradılması haqqında fərman imzalayıb. Şuraya ölkədə makroiqtisadi sabitliyin qorunması və sosial-iqtisadi inkişafın sürətləndirilməsi məqsədilə qlobal və milli iqtisadiyyatda, o cümlədən fiskal və monetar sektorlarda, həmçinin maliyyə-bank sektorunda baş verən proseslər öyrənilməklə cari və ortamüddətli dövr üçün iqtisadi siyasətin formalaşmasına, habelə ölkə iqtisadiyyatında yarana biləcək daxili və xarici təsirlərin qarşısının alınmasına yönəlmiş qabaqlayıcı tədbirlərin görülməsi məqsədilə həyata keçiriləcək islahatların və iqtisadi siyasətin istiqamətinin müəyyən edilməsinə dair təkliflərini hazırlayıb Azərbaycan Respublikasının Prezidentinə təqdim etmək tapşırılıb.
Xəbər verildiyi kimi, dünya bazarlarında neftin qiymətindən asılı olaraq 2020-ci ilin yekunları üzrə Azərbaycanda ÜDM-nin 2,9% - 4,3% səviyyəsində azalacağı proqnozlaşdırılır.
İqtisadiyyat Nazirliyinin proqnozlarına görə, 2021-ci ildə ÜDM 3,4%, 2022-ci ildə 4,8%, 2023-cü ildə 3,7%, 2024-cü ildə 3,1% artacaq.
Proqnozlara görə, 2021-ci ildə Azərbaycanda ÜDM-nin nominal həcmi 75,3 milyard manat, 2022-ci ildə 80,5 milyard manat, 2023-cü ildə 85,1 milyard manat, 2024-cü ildə 89,5 milyard manat təşkil edəcək.
2019-cu ildə iqtisadi artım 2,2% təşkil edib.*
Ə.Məmmədov