Azərbaycan Nazirlər Kabineti COVİD-19 koronavirus səbəbindən karantin dövründə ölkədə fəaliyyət göstərən təhsil müəssisələrində tədris prosesinin təşkili qaydalarını təsdiq edib.
“İnterfaks-Azərbaycan”ın əldə etdiyi Nazirlər Kabinetinin qərarına əsasən, təhsil müəssisəsinə daxil olan şəxslərin termal kamera sistemləri və ya təmassız termometr vasitəsilə hərarəti ölçülür, bədən hərarətinin 37.1°C və ya daha yüksək olduğu müəyyən edildikdə, onların müəssisəyə daxil olmasına yol verilmir.
Həmçinin, təhsil müəssisəsinə tibbi maska taxma tələbi qoyulan şəxslərin maskasız daxil olması qadağandır.
Karantin dövründə təhsil müəssisələrində əyani formada tədris və təlim- tərbiyə prosesinə yaşı 65-dən aşağı olan təhsilverənlər cəlb olunacaqlar. Tədris və təlim-tərbiyə prosesinə cəlb olunmayan yaşı 65-dən yuxarı olan təhsilverənlərin işində yaranan fasilələr onların iş vaxtına daxil edilir və əməkhaqqı saxlanılır.
Ümumi təhsil müəssisələrində dərs (təlim) və dərsdənkənar (praktiki) məşğələ saatları məktəbəhazırlıqmərhələsində 30 dəqiqə, ibtidai və ümumi təhsil səviyyələrində 45 dəqiqə olmaqla müəyyən edilir. Peşə təhsili müəssisələrində dərslərin davametmə müddəti 30 dəqiqədir.
Dərslərarası (məşğələlərarası) fasilələr 10 dəqiqədən az olmayaraq müəyyən edilir. Fasilələrdə təhsilalanların imkan daxilində təmiz havada olması təmin edlir.
Partaların bir-birindən 1,5 m aralıda düzülməsi təmin edilməlidir.
Şagirdlərin sıxlığının aradan qaldırılması məqsədilə təhsil müəssisələrinə dərslərin növbəli qaydada təşkili tövsiyyə olunur.
Təhsil müəssisələrində xüsusi karantin rejimi dövründə idman və akt zallarından, kitabxana və hovuzdan istifadə dayandırılır.
Bu qaydaların tələblərinə riayət olunmasına ümumi nəzarət və koordinasiya Təhsil Nazirliyi tərəfindən həyata keçiriləcək. **
X.Nəsirzadə