Azərbaycan prezidenti İlham Əliyev Ermənistan rəhbərliyini Qarabağ nizamlanması üzrə danışıqlar prosesinin pozulmasında günahkar hesab edir.
“Danışıqların hazırki vəziyyətini mənfi qiymətləndirirəm... Faktiki olaraq, danışıqlar aparılmır... Mən qeyd etmişəm ki, biz immitasiya xarakterli danışıqlarda iştirak etməyəcəyik. Bu, bizim danışıqlardan imtina etməyimiz demək deyil, bu o deməkdir ki, Ermənistanın hiyləgər siyasətinə qoşulmaq istəmirik”, - Əliyev şənbə günü Azərbaycan telekannalrına müsahibəsində bildirib.
Həmçinin, Azərbaycan prezidenti vurğulayıb ki, ötən il Ermənistanın baş naziri “Qarabağ Ermənistandır” bəyanatı ilə danışıqlar prosesinə ciddi zərbə vurdu.
“Əgər o hesab edir ki, Qarabağ Ermənistandır, onda nə barədə danışmaq olar? Əgər o, belə hesab edir ki, Qarabağ Ermənistandır, - halbuki bütün dünya bu cəfəng fikri rədd edib, - onda hansı sülh müqaviləsindən söhbət gedə bilər. Yəni, bu, siyasi təxribat idi”, - Əliyev bildirib.
Onun sözlərinə görə, Ermənistan tərəfindən daha bir təxribat “Azərbaycan Ermənistanla yox, Dağlıq Qarabağla danışıqlar aparmalıdır” tələbindən ibarət idi.
“Bu da formatı dəyişdirmək deməkdir və buna əlbəttə ki, biz heç vaxt razı ola bilmərik. Faktiki olaraq bu açıqlamalar onu deməyə əsas verir ki, Ermənistan danışıqlardan çıxıb, biz yox, Ermənistan. Belə olan halda, biz duraq deyək ki, gəlin danışıqlara başlayaq, yaxud da ki, davam edək, sadəcə, məsuliyyətsizlik olar və özümüz-özümüzü aldatmamalıyıq, xalqımızı aldatmamalıyıq. Danışıqlar getmir və bu, pandemiyaya görə baş vermir. Əlbəttə, pandemiya müdaxilə edib, amma pandemiyasız da danışıqlar getmir. Siyasi cəhətdən qüsurlu və ziyanlı bu bəyanatlar danışıqlar üçün yer qoymur”, - Əliyev vurğulayıb.
Eyni zamanda, o əlavə edib ki, Ermənistanda rasional düşünən insanlar və siysətçilər var və onlar bu məsələni artıq qaldıraraq, hazırki rəhbərliyin ölkəni uçuruma aparması ilə bağlı fikirlərini Ermənistan ictimaiyyətinə çatdırırlar. **
N.Abbasova