Sentyabrın 22-də Ukrayna prezidenti Vladimir Zelenski və Azərbaycan prezidenti İlham Əliyev telefon söhbəti zamanı enerji, nəqliyyat, investisiya, kənd təsərrüfatı və digər sahələrdə əməkdaşlığın genişləndirilməsi üçün konkret addımları müzakirə ediblər.
“Sentyabrın 22-də Ukrayna prezidenti Vladimir Zelenski Azərbaycan prezidenti İlham Əliyevə telefonla zəng edib. Dövlət başçıları pandemiya ilə mübarizə sahəsində Ukraynada və Azərbaycanda həyata keçirilən işlərdən danışıblar. Söhbət zamanı Vladimir Zelenski bildirib ki, Ukraynanın yeni milli təhlükəsizlik strategiyasında Azərbaycan strateji tərəfdaş kimi göstərilib. Prezident İlham Əliyev, öz növbəsində, qeyd edib ki, Azərbaycan üçün də Ukrayna strateji tərəfdaşdır”, - deyə Azərbaycan prezidentinin mətbuat xidmətinin məlumatında bildirilir.
Dövlət başçıları Ukraynanın və Azərbaycanın suverenliyi və ərazi bütövlüyü məsələlərində ölkələrimizin bir-birini dəstəklədiyini qeyd ediblər.
“Telefon söhbəti zamanı enerji, nəqliyyat, investisiya, aviasiya sənayesi, kənd təsərrüfatı, turizm, humanitar və idman sahələrində əməkdaşlığın genişləndirilməsi üçün konkret addımların atılmasının zəruriliyi qeyd edilib”, - deyə məlumatda vurğulanır.
Prezident İlham Əliyev Ermənistan tərəfindən Azərbaycana qarşı törədilən hərbi təxribatlar barədə Ukrayna prezidentini məlumatlandırıb.*
A.Əhmədova