2020-ci ilin əvvəlindən Aqrar Kredit və İnkişaf Agentliyi (AKİA) kənd təsərrüfatı məhsulları istehsalçılarına 51 milyon manat kredit ayırıb. Bu barədə agentliyin məlumatında deyilir.
Kredit vəsaitləri texnika və damazlıq heyvan alışına, mikrokreditlər və digər kənd təsərrüfatı təyinatlı kreditlərə yönəldilib.
“Bu günədək Aqrar Kredit və İnkişaf Agentliyinin vəsaitləri hesabına 1895 fermerə 18 milyon manatadək mikrokredit verilib. Bu mikrokreditlərin 15 milyon manatı heyvandarlıq sahəsi ilə məşğul olanlara ayrılıb”, - deyə məlumatda bildirilir.
Ötən dövrdə kənd təsərrüfatı texnikası və damazlıq heyvan alışı üçün aqrar sahə iştirakçılarına AKİA tərəfindən 64 milyon manatdan artıq güzəşt vəsaiti ödənilib. Bu vəsait fermerlərin təchizatçılardan aldıqları 5876 damazlıq heyvanın və 4140 kənd təsərrüfatı texnikasının dövlət tərəfindən ödənilən güzəşt məbləğini təşkil edir.
Aqrar Kredit və İnkişaf Agentliyinin vəsaitləri hesabına fermerlərə mikrokreditlər 12%, nağd pul və digər kənd təsərrüfatı təyinatlı kreditlər 7%-lə verilir. Kənd təsərrüfatı məhsulları istehsalçılarının aldıqları damazlıq heyvanın qiymətinin 60%-i, texnikanın qiymətinin isə 40%-i dövlət tərəfindən ödənilir.
Prezident İlham Əliyev 2020-ci ilin aprel ayında koronavirus pandemiyası şəraitində və sonrakı dövrdə kənd təsərrüfatı məhsulları istehsalçılarının mikrokreditlərlə təminatının yaxşılaşdırılması üçün vəsait ayrılması haqqında sərəncam imzalayıb. Sərəncama əsasən, bu məqsədlə Aqrar Kredit və İnkişaf Agentliyinə 30 milyon manat ayrılıb.
Mikrokreditlərin maksimal həddi 15 min manat, müddəti 3 il, illik faiz dərəcəsi 12% təşkil edir.*
B.Rüstəmbəyov