Azərbaycanın işğal altında olan torpaqlarını azad etməyə tam haqqı var. Bunu ATƏT-in Minsk qrupunun ABŞ-dan olan keçmiş həmsədri, Amerikanın Azərbaycandakı sabiq səfiri Metyu Brayza bildirib.
“BMT Təhlükəsizlik Şurasının 1993-cü ildə qəbul etdiyi dörd qətnamə var. Orada Ermənistan Azərbaycanın işğal altında olan torpaqlarını dərhal tərk etməyə çağırılır və döyüş əməliyyatlarının dayandırılmasına çağırış edilir. 1994-cü ildə döyüş hərəkətləri doğrudan da dayandırılıb, lakin Ermənistan hələ də buradan getməyib. BMT Təhlükəsizlik Şurasının qətnamələri beynəlxalq hüququn ən ali təzahürüdür. Buna görə də bu gün Ermənistan beynəlxalq hüquqdan kənardır və Azərbaycanın özünün işğal altında olan torpaqlarını qaytarmağa tam haqqı çatır”, - deyə hazırda ABŞ-ın Atlantika Şurasının böyük elmi işçisi olan M.Brayza “Region plus” jurnalına müsahibəsində bildirib.
Onun sözlərinə görə, Vaşinqtonun da münaqişə ilə bağlı mövqeyi dəyişir. “Buna əmin olmaq üçün ABŞ-ın siyasətinə və hətta Nümayəndələr Palatasının son qətnaməsinə nəzər salmaq kifayətdir. Baxmayaraq ki, həmin qətnaməni erməni diasporunun güclü olduğu Kaliforniya ştatından olan konqresmenlər irəli sürüb. Bu qətnamədə Azərbaycan aqressivlikdə ittiham olunur, lakin beynəlxalq hüququn pozulması və ya qanunazidd hərəkətlərdə günahlandırılmır. Məncə, bunun özü hər şeyi deyir”, - deyə Brayza bildirib.*
A.Əzizov